FAARSO ROORE FAARSO 6 - Qullaawa Maxaafa

IDAYICHOTE JAALLA

¹ Ati meyata baala roorootta xuma, baxillaanchikki hiikka ha'rino? Ninke ate ledo hanseemmona, hiikka ha'rinoro kulinke.

ADHANTANNO BEETTO

² Baxillaanchi'ya, itaranna daraaro gamba assi'rara, su'niitanno haqqe fultannowa gatisira ha'rino.

³ Baxillaanchi'ya aneho; anino isite; isino daraarote giddo itanni no.

ONTIKKI FAARSO ADHANNO BEETTO

⁴ Baxillaancho'ya, ati Tiritsa katami gedee xumaati; Yerusaalamete gede biifoottate. Baandira amadde hadhanno olanto gede, waajjishanno xirchi noohe.

⁵ Ane qafadde usuranya assitannoena, eeggatena illekki ane aaninni hooli. Dananchikki Geleaadinni dirrannoha, koliddaanna me"e lawanno.

⁶ Hinkokki giddonsa maseena heedhukkinni, lakkuwa qalannohunna, hayishshinoonnihu waajjuullu ge'reewi gede baxissannote.

⁷ Kiccakki guggu'laanchikki giddoonni la'niro, lamewa balka yitinota roomaanete laalo labbanno.

⁸ Leyawu mootete meenti, settawu irkote meentinna, kiiro anfoonnikkihu aju seenni no.

⁹ Ani baxeemmoti kayinni mitte callate; iseno kullannire afidhinokki lemboolcho gedee xumaati; ise amasera mittete; iltinose amano wo'munkunni roorsite baxxannose. Seennuno ise la"anni guwisannose; mootete meentinna irkonnihu naadannose.

¹⁰ Tini soodimari xawaabbi gedeeti, aganu gede biiffinoti; arrishshote gede xabbannoti, baandira amadde hadhanno olanto gede, waajjishanno xirchiti tini ayeti?

¹¹ Lagaho kaasantino haqqe lattino gara la"ate, woyine ciirtinotanna roomaane daraartinota la"ate, kooke loonsanniwa dirroommo.

¹² Tenne giddo, mootete faradi gaare gulufe noommoha lawinoe.

IDAYICHOTE JAALLA

¹³ Ati Shulaamitte, amo higi; seekkine la'neemmohe gede amo. Lame gaamo mereero sirbanna, la'inaera mayira hasidhini?