FAARSO ROORE FAARSO 3 - Qullaawa Maxaafa

¹ Hashsha wo'ma daallasi'ya aana hee're, lubbo'ya baxxannoha afi'rate hasi'roomma; diinaggaawe hasi'roomma; afi'ra kayinni didandoomma.

² Katamu giddo noota, ruukkadonna hala'lado doogga baala ha'ramoomma; lubbo'ya baxxannoha afi'rate hasi'roomma; afi'ra kayinni didandoomma.

³ Ha'rantanni katama agartannori affinoe; anino, «Lubbo'ya baxxannoha affinini?» yee xa'moomma.

⁴ Insawiinni shiima geeshsha sa"anni hee'renni, lubbo'ya baxxannoha afi'roomma. Fulannokki gede seekke cu'mi'roomma; ama'ya minira adhe ha're, ani ilamoomma holgira eessi'roomma.

⁵ Ki'ne Yerusaalamete seenne! Baxillu umisi hasi'ra geeshsha, kayissinannikki gedenna baqqi assitinannikki gede, gaarraanchunna bulaate su'minni eegameemma'ne.

SAYIKKI FAARSO ADHANTANNORE DUKKISINO MANNA

⁶ Wiliilete gede hossi yiinohu, su'narunna kaarbete foole afi'rinohu, kuni halallinni daannohu maati?

⁷ Kuneeti Selemoonihu ayirradu barcimi daanni no; Israeelete wolqaataammi giddonni doorroonniri, 60 ayirradda agaraasine dukkisse no.

⁸ Baalunku bagado amandanni gara egentinoreetinna, olunni fullakkinoreeti. Hashsha dagganno dano gargarate, mittu mittunku bagado qodhitino gedeenni galtanno.

⁹ Moote Selemooni ofollannohu, ayirradu barcimisi, Libaanoosi daguwinni seekkinoonniho.

¹⁰ Ayirrado barcimasi dukkino tuuqqa, aanaho birra xallinoonnireeti. Irki'rannorichi culkunni seesiinsoonniho; ofollannowa xiillicha hocco aanaho dimboonni; giddoyidosi Yerusaalamete seenni baxillinsanni goode seesiisino.

¹¹ Ki'ne Tsiyooni seenne, moote Selemooni la"ate amme! Isi, amasi wortinosita ayirrinyu ba'latto umoho wodhe no; tenne ba'latto, hagiirrunnihu adhamasi jili barra wodhanno.