FAARSO 99 - Qullaawa Maxaafa

KAALIIQI ROORIIDI MOOTEETI

¹ Kaaliiqi moohi; daga baalano qece yito; kirubeelira iimaanni ofolli; baattono huxidhanno.

² Kaaliiqi Tsiyooni jawaho; daga baalate gashshaannaati.

³ Wo'munku lowohanna ayirrado su'masi galato; isi qullaawaho.

⁴ Ati roore mooteeti; halaale baxatto; Israeelete mereero halaale worootto; taalonna halaalaancho yoo uurrisootto.

⁵ Maganonke Kaaliiqa galattesi; qullaawu isootina, ayirrinyu barcimisira albaanni kumbuullesi!

⁶ Musenna Aarooni isi qeesootaati; Saamueelino iso huuccituri giddo mittikkiho. Insano Kaaliiqa woshshitu; isino yee yiinsa.

⁷ Gomichu aana hee're coyi'rinsa; insano uyinonsa seeranna hajajo wonshitino.

⁸ Kaaliiqa Maganonke! Ati mannikki huuccatto macciishshootto; maarattoha ikkoottota kuloottonsa; ikkollana kayinni bunshe loossanno woyite qorichishattonsa.

⁹ Maganonke Kaaliiqa galattesi; qullaawu ilaalisi aanano magansidhesi; Kaaliiqi Maganinke qullaawahona.