FAARSO 97 - Qullaawa Maxaafa

MAGANU WO'MUNKURA ALIIDI GASHSHAANCHOOTI

¹ Kaaliiqi moohinona, baatto hagiidhito; giddichuwa baalate tashshi yoonsa.

² Gomichunna tunsichu gaangaawisira no; gashshootisi keeraanchimmatenna halaalu aana xintaminoho.

³ Bubbanno giira albasiinni hadhanno; qooxeessisira noo diinano ittanno.

⁴ Banqosi beleqi kalqe xawisanno; baattono la'e huxidhanno.

⁵ Baatto baalate Mootichi, Kaaliiqi albaanni, ilaalla gagate gede daaqqanno.

⁶ Gordu keeraanchimmasi duduwanno; daga baala ayirrinyesi la'anno.

⁷ Seesiinsoonni misilera kumbuulannohu baalu, kaphu maganna adawadhitannori baalu saalfatto; maganna baala Kaaliiqira kumbuultanno.

⁸ Kaaliiqa, Tsiyooni manni yookki macciishshe hagiidhi; Yihudu katammarano tashshi yiinsa.

⁹ Ati Kaaliiqi baatto baalate aana wo'munkura aliidiho; maganna baalantenni umiidiho.

¹⁰ Isi bunshe gibbannore baala baxanno; Kaaliiqi keeraanote lubbo agaranno; bushu manni angannino gatisannonsa.

¹¹ Keeraanote xawaabbu fulinsa; wodana subbinorira hagiirru dayinsa.

¹² Ki'ne keeraano Kaaliiqinni tashshi yoo'ne; Qullaawa Magano, assino danchummara galattesi.