FAARSO 92 - Qullaawa Maxaafa

GALATU FAARSO

FOOLIISHSHOTE BARRITA GALATU FAARSO

¹ Kaaliiqa! Ate galaxxa, Wo'munkura Aliidi Maganira faarsa hiittoo danchaati!

² Soodo bagamannokkiha baxillekki, hashsha halaalaanchimmakki duduwa hiittoo danchaati!

³ Baganunni, maasinqotenninna gingilaatunni, atera galata shiqisha danchate.

⁴ Kaaliiqa'ya! Loosikkinni hagiirsiisoottoena, loosootto loosira hagiirrunni faarseemmohe.

⁵ Kaaliiqa, loosikki mageeshshi geeshsha jawaho! Hedokkino iilline dianfannite.

^6-7 Bushuullu hayissote gede mudhurono, haxawarrootu latturono horonta ba'annore ikkitinota, hawanyu manchi diegennino; wodaniweeluno diwodanchanno.

⁸ Kaaliiqa, ati kayinni hegere geeshsha wo'munkura aliidiho!

⁹ Kaaliiqa, kuneeti baarigaarrakki ba'anno; bushuullu baalu billaallitanno.

¹⁰ Haxo'ya kaajjishshe gotti assittoe; umi'yara buurokki buuroottoe.

¹¹ Diinna'ya qeelantanna ille'yanni afoommo; shetissueri ba'uta macca'yanni macciishshoommo.

¹² Keeraano saattu gede lattanno; Libaanoosi daguwi gede ikkite lophitanno.

¹³ Tini haqqe Kaaliiqi nafara kaansoonnite; Qullaawa Minesi latte heedhanno.

¹⁴ Geedhimmate yannara nafa guma laaltanno; wo'manka woyite lattenna kaajjite heedhanno.

¹⁵ Kuni coyino Kaaliiqi halaalaancho ikkinota, goli'ya bunshe afi'rinokkiha ikkinota leellishanno.