FAARSO 89 - Qullaawa Maxaafa

GALATU FAARSO

IYIZIRAEELICHU ETAANI ROSIISHSHA

¹ Kaaliiqa, ani bagamannokkihu baxillikki daafira, wo'manka woyite faarseemmo; ilamate ilamara halaalaanchimmakki duduweemmo.

² Bagamannokkihu baxillikki hegerera hee'rannotanna, halaalaanchimmakkino gordoho soorrantukkinni heedhannota afoommo.

³ Atino, «Doodhoommohu ledo gondooro eoommo; borojjichi'ya Daawitira xaaroommo.

⁴ Kunni gondoorinni, ‹Mootimma wo'manka woyite oosokki oosota assoommo; gashshootu horontanni minikkinni difulanno› » yootto.

⁵ Kaaliiqa, assootto dhaggera gordu galatohe; halaalaanchimmakki daafira keeraano songonsara faarsitohe.

⁶ Kaaliiqi ledo taalamannohu gordoho nooni? Gordoho noo kalaqami giddo Kaaliiqa lawannohu ayeti?

⁷ Keeraanote songo mereero Kaaliiqi ayirradoho; qooxeessaho noorira baalaho jawahonna waajjishannoho.

⁸ Olantote Magano Kaaliiqa! Ate gedee wolqaataami mama no? Wo'munku coyira ati ammanamoottoho.

⁹ Atera baaru wolqa hajajantannohe; kaino dambalano uurrisatto.

¹⁰ Reaabi yinanni moyicho daneessootto; jawa wolqakkinni diinnakki billaallisootto.

¹¹ Gordunna baatto atereeti; kalqenna giddose noore baala ati kalaqootto.

¹² Aliyyenna wodiido ati kalaqootto; Taaboori Ilaalinna Hermooni Ilaali atera hagiirrunni faarsitannohe.

¹³ Angakki hiittoo jawaataati! Wolqakkino lowo geeshsha jawate.

¹⁴ Gashshootikki keeraanchimmatenna taashshate aana uurrino; bagamannokkihu baxillikkinna halaalaanchimmakki loosikkinni leeltanno.

¹⁵ Ate faarsotenni galattannoherinna xawaabbikki giddo heedhannori hiitto baraadhinoreeti!

¹⁶ Su'mikkinni barra wo'ma hagiidhitanno; keeraanchimmakkirano galattannohe.

¹⁷ Ayirrado wolqakki wolqaataamma assitinonke; ate shaqqillinni jawaante lexxitinonke.

¹⁸ Agaraanchinke Kaaliiqiwiinniiti; Israeelete Qullaawa ikkinohu Maganu moote uyinonke.

KAALIIQI DAAWITI LEDO EINO GONDOORO

¹⁹ Bi're ammanantino soqqamaanokkira, ajuujatenni coyi'dhanni, «Gashshoote'ya bareedu anga woroommo; mannu mereerinni doodhoommoha gotti gotti assoommosi.

²⁰ Borojjicho'ya Daawiti afi'roommo; qullaawa zayite'ya buuroomosi.

²¹ Wo'manka woyite anga'ya irkissannosi; wolqa'yano jawaachishshannosi.

²² Baarigaarrasi isi aana wolqa diafidhanno; bushuullu qeelte diaffannosi.

²³ Baarigaarrasi albasiinni cancaneemmo; gibbannosireno shee gudeemmo.

²⁴ Halaalaanchimma'yanna bagamannokkihu baxilli'ya ledosi hee'ranno; su'mi'yanni wo'ma woyite qeellenniha asseemmosi.

²⁵ Gashshootesi Baarunni kayise, hadhanno wayibba geeshsha halashsheemmo.

²⁶ Isino, ‹Ati anna'yaati, Magano'yaati, golo'yaatinna gatisaancho'yaati› yaannoe.

²⁷ «Anino bayira beettonna mootoolla baalantera aliidiha asseemmosi.

²⁸ Isira nooeha bagamannokkiha baxille'ya hegerera qaageemmo; isi ledo eoommoha gondooro'ya soorramannokki gede asseemmo;

²⁹ Sirchisi hegere hegerera moohanno; gashshootisi gordu noo yanna geeshsha hee'ranno.

³⁰ Oososi seera'ya habburonna, hajajo'ya gede ikkite hee'ra hoogguro,

³¹ woga'ya ayirrisa gibburo, biddishshi'ya garinni hee'ra gibburo,

³² cubbinsa daafira qorichisheemmonsa; saonsa daafira qarra abbeemmonsa.

³³ Kayinnilla, bagamannokkiha baxille'ya Daawitiwiinni dixeertiseemmo; oommosi hexxono badhera diqoleemmo.

³⁴ Ledosi eoommo gondooro didiigeemmo; oommosi hexxono disoorreemmo.

³⁵ Daawiti dogeemmokki gede, qullaawu su'mi'yanni mitte hige xaaroommo.

³⁶ Sirchisi hegere hegerera moohanno; minisi gashshooti arrishsho heedhanno geeshsha keeshshanno.

³⁷ Gordoho soorramikkinni hee'ranno agani gede, mootimmasino hegerera heedhanno» yootto.

MOOTETE QEELAMA DAAFIRA DADILLINOONNI DADILLE

³⁸ Ati kayinni moohisoottohura hanqoottosi; gibbe tugge aguroottosi.

³⁹ Borojjichikki ledo eootto gondoorono diigootto; ba'lattosino bushshaho tugootto.

⁴⁰ Katamisi huxxano cancanootto; qiishubbasino diigootto.

⁴¹ Hakkaanni hige sa"annohu baalu, jajjasi saamanno; olliisi baalu oso'lannosi.

⁴² Diinnasira qeelle ootto; baarigaarrasi baala hagiirsiisitto.

⁴³ Bagadosi badisootto; olu giddono dikaa'loottosi.

⁴⁴ Gashshote siqqicho angasinni hoolootto; ayirrinyu barcimasino uulla tugootto.

⁴⁵ Yanni-male akkalsoottosi; saala uddisiisoottosi.

GATE FULATE YINE HUUCCI'NOONNI HUUCCATTO

⁴⁶ Kaaliiqa'ya, albakki mamari geeshsha go'lattoe? Hanqikkino giirate gede buwino gedeennilla hee'ranno?

⁴⁷ Diri'ya mageeshshi geeshsha haranchohoro lai; halaalintanni manna beebballa kalaqootto yaateni!

⁴⁸ Reyo afikkinni hee'rannohu nooni? Umosi waammatewiinni gatisi'rannohu ayeti?

⁴⁹ Mooticha, ammanamakkinni Daawitira xaaroottohu, albihu bagamannokkihu baxillikki hiikki?

⁵⁰ Mooticha'ya ballo, ani borojjichikki qacifatamanna, duqqe hee'reemmota dagate rumo lai.

⁵¹ Kaaliiqa'ya, moohisoottoha xontanno; mariwa baala qacifattanno.

⁵² Kaaliiqi hegerera galatamo. Hamii'ni! Hamii'ni!