FAARSO 88 - Qullaawa Maxaafa

MAGANU KAA'LO AFI'RATE SHIQINSHOONNI HUUCCATTO

QORE OOSO FAARSO. FAARSAANOTE ROORRICHIRA MUUZIIQU QOONQONNI (MAHALAATINNI) FAARSATE IYIZIRAEELICHU EEMAANI ROSIISHSHA

¹ Gatisaancho'ya ikkoottohu Kaaliiqa Magano'ya ballo, hashshanna barra albakkiinni woxarateemmo.

² Huuccatto'ya albikkira daggona; maccakkino raare'ya widira qoli.

³ Lowo qarri amadeennae, reyote gambisoommo.

⁴ Mannu reyinohu gede asse kiirie; wolqano co'o yite gooffue.

⁵ Reyitinori mereero tugame hawamummo; shine mooggate giddo tungoonnihu gede, ati horonta qaagattonsakkirinna kaa'lattonsakkiri gede ikkummo.

⁶ Ati qile balera tugittoe; waammate giddo agurittoe.

⁷ Hanqikki lowo geeshsha gawajjinoe; dambalu gede egemminoe.

⁸ Callateemmo gede egentinoere anewiinni xeertisootto; insa albaanni diqatamoommoha assoottoe; ragu baalu huxxameenna fuleemmo farono hoogoommo.

⁹ Dadillu batinyinni, kainohunni ille jallaaggue. Kaaliiqa ballo, barru barrunkunni atewa hige raareemmo; huuccattote anga'ya ate widira qole fa'neemmo.

¹⁰ Halaalintanni reyitinorira maalale assattoni? Reyitinorino ka'e galattannoheni?

¹¹ Baote darga noori halaalaanchimmakki kultannoni? Waammate giddo noori bagamannokkiha baxillekki dudubbannoni?

¹² Maalalekki tunsichoho leeltannoni? Hawantinori noo gobbara gatisaanchimmakki egennantannoni?

¹³ Kaaliiqa'ya! Ani kayinni atewa hige raareemmo; soodo soodontenni huuccatto'ya atewa iillitanno.

¹⁴ Kaaliiqa'ya ballo, ane mayira tugittoe? Albakki mayira maaxittoe?

¹⁵ Ani anje'yanni kayise qarramoommohonna reyote gambisoommoho; hanqikkinni kainohunni hawaaxamoommo.

¹⁶ Aarikki aana'ya uwe cancaninoe; waajjishannohu hanqikki huninoe.

¹⁷ Insa barra wo'ma lolahu gede gaangeessitinoe; mitteenni gamba yite cuuncitinoe.

¹⁸ Fiixa'yanna jaalla'ya nafa muli'yanni xeertisseenna, tunsichu callu jaala ikkinoe.