FAARSO 84 - Qullaawa Maxaafa

MAGANU MINE HEE'RATE HALCHO

FAARSAANOTE ROORRICHIRA SUUSULLETENNI QORE OOSO FAARSO

¹ Olantote Kaaliiqa! Ati galattowi hiitto baxisannoho!

² Ani hakkiicho hee'rate halchoommo; Kaaliiqi mineno sinsinnaawoommo. Heeshshote Maganira wo'mu wodani'yanni hagiidhanni faarseemmo.

³ Olantote Kaaliiqa Magano Moote'ya! Gurrae nafa umise mine, bukukkaama caacurrise galannowa, kakkallannihe dargi mule mi'nitanno.

⁴ Wo'manka woyite galatu faarso faarsitanni, minekki heedhannori baraadhinoreeti.

⁵ Tsiyooni Ilaala hadhara hasidhanno woyite, atewiinni wolqa daggannonsari baraadhinoreeti.

⁶ Wi'late lagichi giddoonni higge sa'anno yannara, hakkiichi buicho fultanno darga ikkannonsa; badheessi xeenino kofamma wonshannonsa.

⁷ Hakkiichira hadhanni heedhe, Jawaantete aana jawaante lexxitanno; magannate Maganono Tsiyooni marte la'anno.

⁸ Olantote Magano Kaaliiqa! Huuccatto'ya macciishshie; Yaiqoobi Magano maccakki kawa qolie.

⁹ Magano! Doorte buuroottoha mootenke maassi'ri; agaraanchonke towatisi.

¹⁰ Wolewa kume barra keeshshantenni, mitto barra ate Mine hosa woyyate; bushuullu mine ofollantenni, Magani'ya Mini xullichira ofolle hosa woyyate.

¹¹ Kaaliiqi agaraanchonkeetinna wonqonkeeti; mararannonke; ayirrinyeno aannonke; danchumma assitannorira dancha coye diho'lannonsa.

¹² Olantote Kaaliiqa! Ate hexxitannori baraadhinoreeti.