FAARSO 83 - Qullaawa Maxaafa

ISRAEELETE DIINI QEELAMANNO GEDE SHIQINSHOONNI HUUCCATTO

ASAAFI FAARSO

¹ Magano ballo, sammi yitooti; cuqqo gibbooti; huuro hooltooti.

² Kuneeti baarigaarrakki haxawarritino; gibbannoheri baalu insanaa gotti gotti assitino.

³ Mannikkira gano gantino; golamoottonsarira busha mala maltino.

⁴ Insano, «Israeelennihu su'minsa hawamanno gede, amme! Gashshootensa diingona» yitanno.

⁵ Hedonsano xaadisidhe, ate aana ka'ara yite, mimmitinsa ledo gondooro e'u.

⁶ Insano: Edoomi, Ismaeeli, Moaabi, Hagaari,

⁷ Gebaali, Amooni, Amaaleqi, Filisxeemetenna, Xiroosi mannaati.

⁸ Asoorino, Looxi ooso Amooninna Moaabi Kaa'le, insa ledo namoomino.

⁹ Insano, Midiyaamoota assitto gedenna, Sisaaranna Yaabiini Qishooni Wayi gama assitto gede assi.

¹⁰ Insa Endoori yinanniwa gudootto; reeshshinsano xawoho hoqe gati.

¹¹ Roorrootansa Hereebinna Zeebi assitto gede assi; gashshaanonsa Zaabiheelinna Silmana assitto gede assi.

¹² Insa, «Maganu utuwa uminkeha assi'neemmo» yitino.

¹³ Magano! Insa bukote gede finci; kuru gede diilallote tugi.

¹⁴ Giira dubbo ittannohu gede, buwanu ilaalla giirannohu gede,

¹⁵ bubbekkinni shorri; hombobolattekkinni masisi.

¹⁶ Magano, albansa saalunni beeshshi; wolqakki affanno gede assi.

¹⁷ Hegerera qeelamanna masillu amadonsana, shollite reyitanno gede assi.

¹⁸ Kaaliiqi ate calla ikkoottotanna, baattote aana Wo'munkura Aliidihu ate ikkoottota affona.