FAARSO 79 - Qullaawa Maxaafa

MANNU KEERI DAAFIRA SHIQINSHOONNI HUUCCATTO

ASAAFI FAARSO

¹ Magano! Daga utuwikki giddora e'u; Qullaawa Minekkino batteessitu; Yerusaalameno diiggu.

² Borojjikki reeshsha allaattete, keeraanote maalano dubbu moyichira uyitino.

³ Diinu Yerusaalamete gaangaawira mundeensa wayimma lolaasino; reyino mannano madaarannohu hoogino.

⁴ Mulenke noo gosano xontinonke; gaangaawinkera heedhannori oso'litinonke; qacifattinonke.

⁵ Kaaliiqa, Hegerera hanqoottonke gedeennilla hee'ratto? Laalakkino giirate gede bubbino gedeennilla heedhanno?

⁶ Mannakki shite gudde, mulla darga assitinona,

⁷ ate egentinohekki daganna, magansidhannohekki gosa aana aarakki dirrisi.

⁸ Annuwanke cubbi daafira yite qorichishshootinke; lowo geeshsha shentoommona, maarokki rakke soyinke.

⁹ Maganonkenna gatisaanchonke ballo! Kaa'linke; su'mikkira yite gatisinke; cubbonkeno agurinke.

¹⁰ Daga mayira, «Maganinsa hiikko no?» yitannonke. Ati borojjikki mundeera insa rabbissanna, illenkenni la'neemmo gede assinke.

¹¹ Usuranyootu raare macciishshi; reyitona yinoonnire bayira wolqakkinni gatisinsa.

¹² Mooticha! Qooxeessinkera noo gosa qacifattuhe qacifatara, lamala ero qolinsa.

¹³ Ninke mannikki, qanchikki ge'reewi kayinni, hegere geeshsha galanteemmohe; galatakkino beettu beettira kulleemmo.