FAARSO 76 - Qullaawa Maxaafa

MAGANU QEELANNOHO

FAARSAANOTE ROORRICHITA BAGANUNNI ASAAFITA GALATU FAARSO

¹ Maganu Yihudu gobbara egennaminoho; su'misino Israeelete ayirradoho.

² Yerusaalamete Katamira Tsiyooni Ilaalira hee'ranno.

³ Hakkiicho hee're, diinu maxxa, wonqo, bisenna olu bagado baala cancanino.

⁴ Magano! Ati lowo geeshsha ayirradoho! Diinakki qeelte ilaallate aaninni higatto yannara, xirchikki waajjishannoho.

⁵ Bareedda baala mulqantino; reyote goxano goxxino; wolqansanna hayyonsa baala mullare ikkitino.

⁶ Yaiqoobi Magano! Rufittonsa yannara, faradaasinenna faradinsa reyitino.

⁷ Magano! Ati baalunku waajjannoheho. Hanqatto woyite albakkiinni uurrannohu dino.

⁸ Ati gordoho heedhe yookki macciishshiishsheenna, baatto waajjite sammi yitu.

⁹ Magano! Kuni ikkinohu, ati kadantinore wodate yoo lallawattora kaitto yannaraati.

¹⁰ Mannu hanqi bati'ri deerrinni atera galatulla lexxannohe; oluwiinni gattinori ayyaanakki ayirrissanno.

¹¹ Magani'ne Kaaliiqira xa'nitinoonnire uuyye; qooxeessaho heedhinoonni gashshaano baala, waajjinanni Maganira afansha abbe.

¹² Isi boonaleeyye gashshaano shollishanno; jajjabba mootoolla masisanno.