FAARSO 75 - Qullaawa Maxaafa

MAGANU HALAALE COYI'RANNO

FAARSAANOTE ROORRICHIRA HUNTOOTI YITANNO HUURONNI ASAAFI FAARSO

¹ Magano galanteemmohe; lowimmakkino dudumbeemmo; dhaggenniha loosokki kulleemmo.

² Maganu, «Hedoommo yanna iillituro, halaalaancho yoo yeemmo.

³ Baattonna baattote aana noori baalu daaqanno yannara, ani baattote tuuqqa kaajjisheemmo.

⁴ Boonaleeyye, ‹Boollaqidhinoonte› bushuulleno, ‹Boo'nitinoonte› yeemmonsa.

⁵ Haxo sangaaggitannokki gedenna, naaxxitannokki gede kuleemmonsa» yaanno.

⁶ Yoo soojjaatinninna galchiminni, woy aliyyenninna wodiidinni didagganno.

⁷ Yoo yaannohu Maganoho; mito bushaho yee mito keereensanno.

⁸ Kaaliiqihu hanqisi finiinchi angasi no; finiinchoho dimbissannota woyinete xajje wonshanno; iseno duneenna cubbaataammu atalunkunni cingiishshidhanno.

⁹ Ani kayinni Yaiqoobi Maganire hegere geeshsha duduweemmo; isira galatunni faarseemmo.

¹⁰ Bushuullu wolqa hiiqqaqqanno; keeraanote wolqa kayinni dhaabbachishanno.