FAARSO 68 - Qullaawa Maxaafa

QEELLETE FAARSO

FAARSAANOTE ROORRICHITA BAGANUNNI DAAWITITA GALATU FAARSO

¹ Maganu kao! Baarigaarrasino billaallito! Gibbannosirino albisinni xooqqo!

² Wiliilete gede ikkite ba'o! Giira gaga daaqissannohu gede, cubbaataammu Maganu albinni hatto ikkite gooffo.

³ Keeraanote kayinni tashshi yoonsa; Maganu albaanni hagiidhito; lowo geeshsha hisatte ilillisso.

⁴ Maganoho geebbe; su'misirano galatunni faarse; gomicho gulufe ha'rannohura doogo qixxeesse; su'misino Kaaliiqaatina, isi albaanni hagiidhe.

⁵ Maganu qullaawu dargisira hee're, buxoho annaho; gunnootaho malannoho.

⁶ Maganu callattinorira mine aannonsa; usurantinore tire hagiirsiisannonsa. haxawarrootu kayinni moola gobbara heedhanno.

⁷ Magano! Mannikkira albaanni fulitto waro, halallitte gobba giddoonni higge saitto waro,

⁸ Siina Ilaali Magani albaanni, Israeelete Magani albaanni baatto huxidhu; gordu xeena lolaasi.

⁹ Magano! Xeena duushshitto; mooltinota baattokki gabbi assitto.

¹⁰ Mannikki giddose galanni no; shaqqillikkinni buxanete hasiisannore qixxeessittonsa.

¹¹ Mootichu hajajo uyi; lowo meenti duduwosi gobba tuqisi.

¹² Olantote mootoolla rakke xooqqanno; qaete hosino meenti qafado beeqqanno.

¹³ Ge'reewo allaaltara badhera gattinori, qoollate birra xallinoonniha, xabbannota culkunni seekkinoonni baalluwa afi'rino lemboola adhitino.

¹⁴ Wo'manka Dandaanno Magani mootoolla billaallisi yannara, Selmooni yinanni ilaali aana dirritanno kaade gede assinsa.

¹⁵ Batinye birxe afi'roottohu ati Baasaani Ilaali, hiittoo jawaataati?

¹⁶ Batinye birxe afi'rino ilaalira heedhinanniri Baasaani manni, hegerera Maganu hee'ranno ilaalira, Magano magansi'ranno manna busha illenni mayira la'inanni?

¹⁷ Maganunniti faradi gaare batinye kumeeti; Mootichu Siina Ilaalinni kae qullaawu minisira daanno.

¹⁸ Kaaliiqi Maganu qafadonna haxawarrootu uyitino afanshi nafa gatikkinni adhe, hee'rannowa iimira ha'ri.

¹⁹ Barra baala duqqannonkehu, Mootichu galataminoha ikko; Maganu gatisaanchonkeeti.

²⁰ Maganinke gatisaancho Maganooti; Maganu Kaaliiqi reyotenni gatisannoho.

²¹ Addinta Maganu baarigaarrasi umo cancananno; bunshete doogo agurtannokkiri sammo dhodhoosanno.

²² Mootichu, «Baarigaarrakki Baasaaninni abbeemmo; baaru diime giddonnino haa're fushsheemmo.

²³ Lekkakki mundeensa kakkaxxitanno; woshshikki baarigaarrakki mundee duuwa geeshsha lacanno» yii.

²⁴ Magano! Qeellenniti qaafokki wo'munkura leeltanno; ati Moote Magani'ya Qullaawu Minikkira dukkinseenna eatto.

²⁵ Faarsaano albaanni, muuziiqu uduunne gantannori badheenni, dibbe gananno seenni mereeroho hee're,

²⁶ «Magano songote mereero galattesi; Israeelete sirchi baalu Kaaliiqa galattesi!» yaanno.

²⁷ Maa'niidihunniti Biiniyaami ga're albissanno; hakkiicho Yihudu roorrooti gaamonsa ledo, Zaabilooninna Niftaalemi roorrootino hoodete no.

²⁸ Magano'ya ballo, wolqakki leellishi; albinte gede xaano wolqakki egensiisi.

²⁹ Yerusaalamete noohura Qullaawu Minikki daafira yite, mootoolla atera afansha haadhe dagganno.

³⁰ Umonsa heeshshi assite birransa uyitahe geeshsha, shomboqqote giddo galanno moyicho Gibitse, dagate mereero heedhannore woraammanna middo rufi! Ola kayissara hasidhannore billaallisi!

³¹ Ayirraddu Gibitsetenni dagganno; Itiyophiyu angasi Maganu widira qole kayisanno.

³² Baattote aani gosa baala! Maganoho faarse! Mootichaho galatunni faarse.

³³ Bi're hundinni kayise gordo gulufe noo Maganita, wolqaataame huurosi macciishshe!

³⁴ Israeelete aana Gaacheena afi'rinohunnita, gordoho wolqasi leellishannohunnita, Maganu wolqa dudubbe.

³⁵ Israeelete Magani, Maganu Qullaawa Minesi waajjinanniho; mannisira wolqanna jawaante aanno; Maganu galatamo!