FAARSO 66 - Qullaawa Maxaafa

GUWISHSHUNNA GALATU FAARSO

FAARSAANOTE ROORRICHIRA GALATU FAARSO

¹ Baattote aana heedhinoonniri baalunku, ilillissinanni Magano galatte.

² Su'misi ayirrinyira faarse; ayirrado galatano uuyyesi.

³ Magano, «Loosikki dhaggenniho; wolqakkino lowota ikkitinohura, baarigaarrakki huxidhe waajjitannohe.

⁴ Baattote aana noori baalu magansidhannohe; galatu faarsono shiqishshannohe; su'mikkirano galatunni faarsitanno» yiiyyesi.

⁵ Amme, Maganu looso la'e! Isi mannu mereero maala'linannire assino.

⁶ Baara moola baattora soorrino; akaakkankeno lolahanno wayi giddoonni higge lekkansanni sa'ino. Kunninni kainohunni, hakkiicho ninkera tashshi yiinonke.

⁷ Wolqasinni hegerera gashshanno; illesi dagate aaninni dika'anno; kunnira, haxawarrootu isi albaanni naaxxitoonke.

⁸ Daga, Maganonke galatte! Qoonqo'ne naggi assitine galattesi.

⁹ Lubbonke agarinonke; umbammora wore dilainonke.

¹⁰ Magano! Giiratenni daashshinanni birri gede, ninkeno fonqolte laoottonke.

¹¹ Woshshaadote giddora eessoottonke; badhenkera qarra bayisiisoottonke.

¹² Baarigaarra aananke guluffanno gede assootto; giiratenna wayi giddoonni hinge sa'noommo; xa kayinni, hala'lado jirote dargira haadhe abboottonke.

¹³ Shilqote kakkalo adhe minikkira e"eemmo; xano'yano abbe atera eemmo.

¹⁴ Qarramummo yannara, afii'yanni coyi'roommotanna, suume'yanni xa'noommota xano'ya atera eemmo.

¹⁵ Harditino saada shilqote kakkalora, woraammanna meu gocca kakkalote shiqisheemmo; shilqono gordo iillitanno.

¹⁶ Maganu assinoere kuleemmo'nena, iso waajjitinanniri baalu amme macciishshe"e!

¹⁷ Qoonqo'ya naggi asse iso huucci'roommo; galata'yano shiqishi'roommosi.

¹⁸ Wodani'yara cubbo maaxi'roommoha ikkoommero, Mootichu dimacciishshannoe.

¹⁹ Ikkollana kayinni, addintanni Maganu macciishshinoe; maccasino huuccatto'ya widira qolino.

²⁰ Huuccatto'ya mishinokkihu, bagamannokkiha baxillesi anewiinni xeertisinokkihu Maganu galataminoha ikko.