FAARSO 64 - Qullaawa Maxaafa

MAGANU KAA'LO AFI'RATE SHIQINSHOONNI HUUCCATTO

FAARSAANOTE ROORRICHIRA DAAWITI FAARSO

¹ Magano! Qarramoommona, hururama'ya macciishshie; baarigaari'ya waajjishiishshinni lubbo'ya gatisie.

² Cubbaataammu gosoominni agarie; bushuullu ganonni maaxxe gatisie.

³ Arrawonsa bisete gede gamaxidhanno; harfaamu afiinni maxxu gede qassanno.

⁴ Keeraancho dugge qassara digaana gonnitanno; waajjitukkinni hedeweelcho idditanno.

⁵ Busha hedonsa wonshate, mimmitonsa jawaachishshanno; «Afannonkehu dino» yite, woshshaado wortanno darga maltanno.

⁶ «Konne assinoommo coye afara dandaannohu nooni? Xaate hedonke wonshi'noommo» yitanno. Kune, mannu wodaniranna mannu hedora, xagarro wo'mitino gara la'e!

⁷ Maganu kayinni insa maxxunni qasanno; insano hedeweelcho madidhanno.

⁸ Maganu afiinsanni fulanno coyinni hunannonsa; la"annonsahu baalu oso'lannonsa.

⁹ Hatte yannara, mannu baalunku waajjanno; insano wodanunni sammi yite assitannore maltanno; Maganu loosono faajjete dudubbanno.

¹⁰ Keeraanchoho Maganunni tashshi yoosi; isono golosi assi'ro; wodana subbinori baalu galattosi.