FAARSO 63 - Qullaawa Maxaafa

MAGANO SINSINNAAWA

YIHUDU HALALLITTERA NOO YANNARA DAAWITI FAARSO

¹ Magano'ya! Ati anera Magano'yaati; ani ate lowo geeshsha sinsinnaawoommo; manninati'ya ate yoranno; waa hoogge buko ikkite mooltino baatto gede lubbo'ya ate goodhanno.

² Qullaawu Minikki giddo laeemmohe gedenna, wolqakkinna ayirrinyekki afeemmo gede assie.

³ Bagamannokkihu baxillikki heeshshotenni rooranno daafira, suumma'ya galattannohe.

⁴ Lubbotenni noommo geeshsha galaxxeemmohe; anga'ya fane ate huucci'reemmo.

⁵ Adonna buuro aginohu gede hagiidheemmo; ateno galatunni faarseemmo.

⁶ Ma'na'yara hee're qaageemmohe; hashsha wo'ma atere hedeemmo.

⁷ Ati wo'manka woyite kaa'loottoena, qoolikki caalira hee're faarseemmohe.

⁸ Lubbo'ya ate cu'midhino; qiniiticho angakkino irkissinoe.

⁹ Shitaera hassannoeri kayinni, baattote woroonni sa'anno.

¹⁰ Bagadoho sayinse uyineenna reyitanno; maalansano yeedaala ittanno.

¹¹ Moote kayinni, Maganu assinore lae hagiidhanno; Maganu su'minni hexxo uyitannori, iso galattanno; kapho coyi'ranno afii kayinni beewanno.