FAARSO 60 - Qullaawa Maxaafa

QEELAMINO MANNI HUUCCATTO

FAARSAANOTE ROORRICHIRA SOORIYOOTA NAHARAAMINNA SOOBA OLAMI YANNARANNA IYOAABINO 12,000 EDOOMOOTA MAXINETE LAGICHIRA SHII YANNARA ROSIISHSHUNNITA DAAWITI MURGO

¹ Magano! Giwoottonke; facci assite aguroottonke; hanqoottonke; xa kayinni higge jawaachishinke.

² Baatto shashshaffe daddarootto; diigante ba'ukkinni gamba assite gowi.

³ Ninke mannikkira shetto leellishoottonke; gaggassitannota woyinete xajjeno hayikkisoottonke.

⁴ Bagaduwiinni gattanno gede, waajjitannoherira malaate oottonsa.

⁵ Baxattohu mannikki gatanno gede, wolqakkinni kaa'linke; huuccattonkeno macciishshinke.

⁶ Maganu Qullaawu Dargisira hee're, «Tashshi yaannae Sekeemi beeheemmo; Sukooti lagicha manni'yara qeecheemmo.

⁷ Geleaadi aneho; Minaaseno aneho; Efireemi siwiilu gullee'yaati; Yihuduno gashshooti'ya siqqooti.

⁸ Moaabi hayishshi'reemmo badirooti; Edoomi umi'yaha ikkinota egensiisate caamma'ya wodheemmowaati. Filisxeemoota qeeloommo daafira qeexaa'leemmo» yiino.

⁹ Qiinshoonni katama ayi massae ikka? Edoomiyaasira ayi haa're ha'rae ikka?

¹⁰ Magano! Ati tugge aguroottonke; olantonke ledono olunniwa fula giwootto.

¹¹ Mannu kaa'lo ditirtannotena, diinanke qeelleemmo kaayyo uyinke.

¹² Maganu ledo hee'ne qeelleemmo; isino diinnanke irraawisanno.