FAARSO 6 - Qullaawa Maxaafa

QARRU YANNA HUUCCATTO

BAGANUNNI FAARSAANOTE ROORRICHITA (SHIMINITITA) DAAWITI FAARSO

¹ Kaaliiqa ballo, hanqikkinni ruffootie; aarikkinni gantootie.

² Kaaliiqa ballo, wolqiweeloommona mararie. Mikita'ya daaqqinona jawaachishie.

³ Lubbo'ya hembeelantinona, Kaaliiqa, mamootella kaa'lattoe?

⁴ Kaaliiqa, dagge gatisie; maarokkinni reyotenni fushshie.

⁵ Reyihu gedensaanni, qaagannohehu dino; waammate giddo hee're galatannohehu dihee'ranno.

⁶ Urattotenni kainohunni daafuroommo; hashsha baala ma'na'yara hee're hindiiddi'reemmo; hindiiddo'yano goxeemmowa shanshitanno.

⁷ Baarigaarra'yanni kainohunni, wi'lanna ille'ya jallaaggeenna, la"a hoogoommo.

⁸ Kaaliiqi wi'la'ya macciishshinoena, ki'ne bunshe assitinanniri baalu, anewiinni faffe!

⁹ Kaaliiqi eegama'ya macciishshino; huuccatto'yarano dawaro aanno.

¹⁰ Baarigaarra'ya baala saalfatto! Lowo geeshsha masso! Hedeweelcho shollite badhera higgo!