FAARSO 58 - Qullaawa Maxaafa

MAGANU BUSHUULLE QORICHISHANNO GEDE SHIQINSHOONNI HUUCCATTO

FAARSAANOTE ROORRICHIRA HUNTOOTI YITANNO HUURONNI DAAWITITA MURGOTE FAARSO

¹ Ki'ne gashshaano halaale loossinannini? Ki'ne mannaho taalo coyidhinannini?

² Dee'ni! Wodani'nenni bunshe calla maltinanni; baattote aana jaddo loossinanni.

³ Bushuullu amansa godowi giddo heedhenni sodhinoreeti; ilantu barrinni kayisse kaphaanote.

^4-5 Harfinsa hamashshunnihu gedeeho; jalli assanno manchi qaalenna kiilaanchu fiiqatto macciishsha gibbe macciweeltino buute gede, macca cu'midhanno.

⁶ Magano! Hinkonsa hiiqqaqqite afoo wonshi; Kaaliiqa! Doobbiyunniha keltansa cancani.

⁷ Insa wayi gede lolaasse huni; doogote tungoonni hayisso gede cancante mooshshi.

⁸ Gagate gede shiilto; ama godowa kisidhino aleeshshi gede arrishsho affoonke.

⁹ Affukkinni utu gede muranto; Maganu jawaatu hanqisinni lubbotenni heedheennanni billaallisonsa.

¹⁰ Bushuulle rabbinsanna la'e keeraano hagiidhitanno; mundeensano kakkaxxitanno.

¹¹ Hatte yannara mannu, «Halaalintanni keeraano angasinni ba'raa'ra adhitanno; hada baattote aana halaale coyi'ranno Magani nooni?» yaanno.