FAARSO 57 - Qullaawa Maxaafa

MAGANU KAA'LO AFI'RATE SHIQINSHOONNI HUUCCATTO

FAARSAANOTE ROORRICHIRA HUNTOOTI YITANNO HUURONNI SAAOOLIWIINNI XOOQE GODAHO MAAXAMI YANNARA DAAWITI MURGO

¹ Lubbo'ya ate addaxxitinona mararie; Magano ballo, mararie; qarru dambali sa"a geeshsha, qoolikki giddo maaxameemmo.

² Anera hedinore wonshannoehuwa, Wo'munkura Aliidi Maganiwa raareemmo.

³ Isino gordunni dawaro soye gatisannoe; xiibbanoereno shollishanno; Maganu bagamannokki baxillesinna ammanamasi leellishannoe.

⁴ Kune baarigaarra'ya itanno doobbiyi gede doyissite nooeta lai; hinkonsa amaxxotenna maxxaho; arrawinsa gamanxoonni biseeti.

⁵ Magano! Iima gordoho ayirri; ayirrinyikki gobba baalate leello.

⁶ Baarigaarra'ya lekka'yara woshshaado wortino; lubbo'yano gadadissino; doogo'yara bale untino; kayinnilla, untino balera insanni qolte ubbino.

⁷ Wodani'ya dishafamannoho; Magano! Wodani'ya dishafamannoho; kunnira geeweemmohe; faarseemmohe.

⁸ Lubbo'ya baqqi yii! Gingilaatunna baganu ka'e! Anino gute kaeemmo.

⁹ Mooticha! Gosate mereero galateemmohe; dagate mereerono faarseemmohe;

¹⁰ bagamannokkihu baxillikki gordoho qasi'rino; halaalaanchimmakkino gomichu geeshsha iillitino.

¹¹ Magano! Iima gordoho ayirri; ayirrinyikkino gobba baalate leello.