FAARSO 54 - Qullaawa Maxaafa

DIINU ANGANNI GATATE SHIQINSHOONNI HUUCCATTO

FAARSAANOTE ROORRICHI BAGANUNNI ZAFAAWOOTU SAAOOLIWA DAGGE: KUNE DAAWITI NINKEWA MAAXAME NO YITE KULTUSI YANNATA DAAWITI FAARSO

¹ Magano ballo, su'mikkinni gatisie; wolqakkinni keereensie.

² Magano ballo, maccakki huuccatto'ya widira qoli; ku'lo'yano macciishshi.

³ Allaggu ka'inoe; mararro nookkiri shitaera hassinoe. Magano maanko diyitino.

⁴ Kuneeti, Maganu kaa'lannoe; Mootichu lubbo'yara irkisaanchoseeti.

⁵ Diinna'yara bunshensa garinni qoli; ammanamoottoha ikkootto daafira insa gudi.

⁶ Qarru baalunkunni gatisoottoena, ille'yano diini'ya qeelama la'inona,

⁷ wodani'yanni kainohunni kakkalo'ya shiqishi'reemmohe; Kaaliiqa su'mikki danchahona galaxxeemmohe.