FAARSO 53 - Qullaawa Maxaafa

MANNU BUNSHE

FAARSAANOTE ROORRICHIRA MUUZIIQU QOONQONNI (MAHALAATINNI) DAAWITI ROSIISHSHA

¹ Hawanyootu wodaninsanni, «Maganu dino» yitanno; baalunku battaabbino; hashakki'nanni cubbo assitanno; dancha coye assannohu dino.

² Wodanchannohunna Magano hasi'rannohu noo gedeenni afara, Maganu gordoho hee're manna baala lai.

³ Baalunku doogosi aaninni wirri yiino; baalunku mitteenni battaawino; dancha coye assannohu mittu nafa dino.

⁴ Maganu, «Manna'ya sagalimma ittannorinna, ane magansidhannokkiri woyyanno coye afa hasiissannonsani?» yaanno.

⁵ Maganu mannisi baarigaarrata miqqansa billaallisanno daafira, noowa heedhe mulla ka'e qece yitanno; Maganu giwinonsa daafira saalfattanno.

⁶ Israeelete gato Tsiyooninni daggoommero maaho! Maganu qafadonsa qolanno yannara, Yaiqoobi mini lowo geeshsha hagiidhanno.