FAARSO 52 - Qullaawa Maxaafa

MAGANU YOONNA ELTOSI

FAARSAANOTE ROORRICHIRA EDOOMICHU DOYIQI SAAOOLIRA: DAAWITI ABEMELEEKI MINIRA DAYINO YIISI YANNARA DAAWITI ROSIISHSHA

¹ Ati wolqaataamo mancho! Bunshekkinni mayira naaxxatto? Wo'manka woyite mayira sao assatto?

² Wodanikkinni woloota hunate malatto; xagarate arrawikki iibbitino milaace gedeeho.

³ Danchummatenni roore bunshe baxatto. halaale coy'rantenni roore kapho coyi'ra halchatto.

⁴ Ati kaphaanchu, manna hunanno coye coyi'ra baxatto.

⁵ Kunnira, Maganu hegerera diigannohe; minikkinnino fushshe hunannohe; baattote aaninnino buqqisannohe.

⁶ Keeraano konne coye affe waajjitanno; qolteno oso'litanni,

⁷ «Maganoho irki'rannokkiha, jirosi batinye ku'lannohanna, bunshe loosasinni hawaqi'ranno mancho kune la'e!» yitanno.

⁸ Ani kayinni Maganu mine latino ejersi gedeeho; hegere hegerera bagamannokkiha Maganu baxille addaxxeemmo.

⁹ Assoottoehu danchu coyira hegerera galaxxeemmohe; su'mikki danchumma mannikki xaadinowa lallaweemmo.