FAARSO 51 - Qullaawa Maxaafa

CUBBOHO MAARO AFI'RATE SHIQINSHOONNI HUUCCATTO

FAARSAANOTE ROORRICHIRA BERSAABEHI LEDO FOOREENNA HIMANAANCHU NAATAANI ISIWA DAYI YANNARA DAAWITI FAARSO

¹ Magano! Bagamannokkihu baxillikki deerrinni maarie; maarokki batinyi deerrinni cubbo'ya agurie.

² Sao'ya baala hayishshite hoolie; cubbi'yanni keereensie;

³ ani sao'ya egennoommo; cubbo'yano wo'manka woyite qaageemmo.

⁴ Ani cubbo loose ate aana calla sao assoommo; ati giwatto coye assoommo; ane aana yoo yaakkinna ane bunshete kiirakki garaho.

⁵ Ilamummo barrinni kayise ani bushaho; godowamummo yannanni kayise ani cubbaataamoho.

⁶ Ati halaalenna sumbe baxatto; wodani'yara egennokki wonshie.

⁷ Keeraa'meemmona, garambichunni wixie; kaadetenni roore waajji'reemmo gede hayishshie.

⁸ Hisachishannorenna tashshi assannore macciishsheemmo gede assie; hiiqqoottoti miqqa'yano hagiidhito.

⁹ Cubbo'ya la'ooti; sao'ya baalanta agurie.

¹⁰ Magano ballo! Keeraancho wodana kalaqie; haaronna suwashsho wodana giddo'ya worie.

¹¹ Albikkinni huntootie; Qullaawa Ayyaanakki aani'yanni adhitootie.

¹² Gatisaanchimmakkinni galagale hagiidheemmo gede assie; maahoyyete ayyaaninni irkisie.

¹³ Hakkunni gedensaanni, seera sa'annorira doogokki rosiiseemmo; cubbaataammuno atewa higganno.

¹⁴ Gatisaancho Magano ballo, shitannoriwiinni agarie; anino keeraanchimmakki duduweemmo.

¹⁵ Mooticha'ya, arrawi'yanni galatakki duduweemmo gede, afoo'ya fanie.

¹⁶ Kakkalo hasi'rattoha ikkoommero eemmohe; ati kayinni dihasi'ratto; shilqote kakkalo tashshi diassitannohe.

¹⁷ Magano ati baxatto kakkalo heeshshi yiino wodanaati; heeshshi yiinohanna atewa higino wodana dimishatto.

¹⁸ Tsiyoonira baxillikkinni dancha coye assisi; Yerusaalamete huxxano huxxi.

¹⁹ Hatte yannara, halaalaancho kakkalonna shilqote kakkalo tashshi assitannohe daafira, ninkeno kakkalote darga woraamma kakkalleemmohe.