FAARSO 46 - Qullaawa Maxaafa

MAGANU NINKE LEDO NO

FAARSAANOTE ROORRICHIRA KAWAJJEESSINOONNI COYI DAAFIRA QORE OOSO FAARSO

¹ Maganu golonkeetinna wolqankeeti; qarru iillannonke yanna baalate kaa'late qixxaawaho.

² Kunnira, baatto shafanturo, ilaallano marte baaru giddo ubburo diwaajjineemmo;

³ wayibba luulte hambiituronna, ilaalla shafanturo nafa diwaajjineemmo.

⁴ Maganu katamira, Wo'munkura Aliidihu hee'rannowa qullaawa darga, tashshi assannohu daadanno wayi no.

⁵ Kaaliiqi mereerosi noo daafira katamu dishafamanno; Kaaliiqi konne katama soodo balaxe kaa'lanno.

⁶ Daga waajjite raartu; gashshootuwano huxidhu; Maganu qoonqosi macciishshiishi woyite baattono daaqqu.

⁷ Olantote Mootichi ledonke no; Yaiqoobi Magani golonkeeti.

⁸ Maala'linanniha Kaaliiqi baattote aana loosino looso, daggine la'e!

⁹ Baattote qacce geeshsha nooha ola uurrisanno; digaana hiiqqanno; amaxxo cancananno; wonqono giire hunanno.

¹⁰ Fooliishshidhe; ani Magano ikkoommotano egenne! Dagate mereeronna baattote aana ayirreemmo.

¹¹ Olantote Mootichi ledonke no; Yaiqoobi Magani golonkeeti.