FAARSO 45 - Qullaawa Maxaafa

MOOTETENNA IDAYICHOTE BAXILLI DAAFIRA GEEMBOONNI GEEWO

FAARSAANOTE ROORRICHI BUUDU XURUMBINNI QORE OOSOTA BAXILLU ROSIISHSHI FAARSO

¹ Wodani'ya dancha coye malanno; geewo'yano mootete kuleemmo; arrawi'ya rahino borreessaanchi biire gedeeho.

² Ati manna baala roore xumaati; Maganu maassi'rinohe daafira, hasaawikki coommannoha ikkino.

³ Ati bareedu! Xirchikkinninna gaacheenikkinni, bagadokki amaxxi.

⁴ Joongillenna taashsha qolate, xirchikkinni qeelle afi'ratto gede gulufi; wolqaataame cigilekki jawa looso loossanno.

⁵ Maxxikki quxaminoho; hakkuno, baarigaarrakki wodanira eanno; dagano lekkakkira woroonni ubbanno.

⁶ Magano! Mootimmakki hegerete; mannakki halaalunni gashshatto.

⁷ Ati halaale baxatto; bunshe giwatto; kunnira, wole mootoollanni rooratto gede, Maganu Maganikki hagiirru buuro buurinohe.

⁸ Uddanokkira kaarbenna shitto assinoonni; daaniichu hinkonni seesiinsoonnihura mootete mine heedhe, gannanni gingilaatinni hagiidhatto.

⁹ Mootete seenni, ayirraddu soqqamannohe meenti mereero no; mootitte culku irra wodhite qiniitekkiinni uurritanno.

¹⁰ Beetto'ya ballo! Macciishshi; maccakkino kawa qoli; kunni ka'a fiixikki amaale adhitooti.

¹¹ Moote xummekki baxino; isi mootichakkiitina ayirrisisi.

¹² Xiroosi seenni afansha haa're abbannohe; dureeyye baxantahera yite albakkiinni loollaabbanno.

¹³ Mootete idayicho mootete mine hiitto biiffino? Uddanose culkunni seesiinsoonnite.

¹⁴ Biifado uddanose uddidhe mootenniwa e'anno; jaallaseno dukkisannose.

¹⁵ Hagiirrunninna hisanyootunni mare, mootete holgira eanno.

¹⁶ Moote! Annuwakki darga mookkannota lowo ooso afi'ratto; baatto baalate aanano gashshaasine assite moohisattonsa.

¹⁷ Su'mikki ilamate ilamara qaagamanno gede asseemmo; kunnira, hegere hegerera daga galattannohe.