FAARSO 44 - Qullaawa Maxaafa

EEGGOTE HUUCCATTO

FAARSAANOTE ROORRICHIRA QORE OOSO ROSIISHSHA

¹ Magano! Ati assoottore maccankenni macciishshinoommo; annuwankeno alba yannansara loosoottoha dhaggete looso kultinonke.

² Ati daga baattonsa aaninni shorrite, ate manna baattonsara worootto; wole gosa qorichishshe, mannakki kayinni qawaaxxisootto.

³ Baatto ragidhinohu dibagadinsanniiti; wolqansano digatissinonsa; qiniinonsahu, ati baxattonsanna, ledonsa heedhe kaa'loottonsa daafiraati.

⁴ Magani'yanna moote'ya ateeti; mannikkirano qeelle aattohu ateeti.

⁵ Ate wolqanni diinanke qeelleemmo; su'mikkinni aananke ka'inore kandeemmo.

⁶ Digaana'ya diaddaxxeemmo; bagado'ya dihexxeemmo;

⁷ Ati kayinni diininkewiinni gatisoottonke; gibbannonkereno shollishootto.

⁸ Magano, wo'manka woyite ate adawadhineemmo; hegere geeshsha galanteemmohe.

⁹ Xa kayinni giwoottonke; shollishoottonke; olantonke ledono fula agurootto.

¹⁰ Diinanke xoonqeemmo gede assoottonke; gibbannonkerino mulqidhinonke.

¹¹ Ge'reewu gede gorramate sayisse oottonke; dagate giddono billaallisoottonke.

¹² Mannakki mullurira hirootto; mulla sayisse ootto.

¹³ Olliinkera heedhanno gosa mishshannonke gede, qooxeessinkera heedhannori oso'litannonkenna qacifattannonke gede assootto.

¹⁴ Dagate maammaashsha, mannu mereerono hii"i! Yinannire assoottonke.

¹⁵ Shollinyi'ya wo'manka woyite leellannae, saalu ille beeshshinoe.

¹⁶ Togo ikkeemmohu baarigaarra'yanna ko'mitinoeri, xontannoenna ceeggifattannoe yannaraati.

¹⁷ Kuni duuchunku ninke aana ikkino; ikkollana kayinni, dihamboommohe; gondoorokkino didiingoommo.

¹⁸ Wodaninke badhera dihigino; qaafonkeno doogokki aaninni wirri diyitino.

¹⁹ Kayinnilla, kaa'lannohu nookkiha moyichu mereero tugge aguroottonke; beebbu tunsichi giddo hunte ha'roottonke.

²⁰ Maganinke su'ma hamboommoha ikkoommero, kaphu maganiwa wodananke qolloommoro,

²¹ Maganu diafanno? Isi diwodanu giddo noore afannoho?

²² Ate daafira wo'ma woyite shinoonninke; gorrinanni ge'reewi gedeno ikkinoommo.

²³ Kaaliiqa! Goxxootina, kainke! Kainke! Hegere geeshsha callachishshootinke.

²⁴ Alba mayira go'latto? Qarrankenna kadamanke mayira hawatto?

²⁵ Uullate aana diriirroommona, bisinkeno baattote qa'minona,

²⁶ Kaaliiqa ballo! Ka'e kaa'linke! Bagamannokkihu baxillikkira yite wodinke.