FAARSO 4 - Qullaawa Maxaafa

KAALIIQA ADDAXXINE HUUCCI'NANNI HUUCCATTO

BAGANUNNI FAARSAANOTE ROORRICHITA DAAWITI FAARSO

¹ Halaalaancho Magano'ya, woshshi'reemmohe woyite dawarie. Shetummo yannara kaa'loottoena, xaano mararie; huuccatto'yano macciishshie.

² Ki'ne manna, mamooti geeshsha ayirrinye'ya heeshshi assitinanni? Mamooti geeshsha haafare baxxinanni? Mamooti geeshsha kapho hasidhinanni?

³ Kaaliiqi keeraano umisira baxxinota affe; isino woshshi'reemmosi woyite macciishshannoe.

⁴ Hanqa hanqena, cubbolla loossinoonte; hatteentenni goxxinoonniwa heedhine, wodani'nenni sammi yitine malle.

⁵ Halaalaancho kakkalo kakkalle; Kaaliiqano addaxxe.

⁶ Lowo manni, «Danchare ayi leellishannonke? Eeggotena Kaaliiqa shaqqillikkinni lainke» yaanno.

⁷ Anera oottoe hagiirri, wolootu lowo gidinninna lowo haaro woyinete xajjenni afidhannohunni rooreho.

⁸ Kaaliiqa, ati agarattoe daafira, keerunni goxe galeemmo.