FAARSO 34 - Qullaawa Maxaafa

KAALIIQI ASSINO KAA'LORA QOLLOONNI GALATA

ABEMELEEKI ALBAANNI MACHARAARINOHU GEDE IKKE FULE HA'RI YANNARA DAAWITI FAARSO

¹ Kaaliiqa wo'manka woyite galateemmosi; galatisino wo'manka woyite afii'yanni dibaxxanno.

² Loosisi daafira Kaaliiqa wo'mu wodani'yanni galaxxeemmo; gadadaammuno tenne macciishshite hagiidhito.

³ Amme, ane ledo Kaaliiqi lowimma kulle; mittimmatenni su'masi ayirrinso.

⁴ Kaaliiqa huucci'rummo, isino dawarie; waajjishannori baalunkunnino gatisie.

⁵ Isiwa shiqqannorira albinsa xawanno; horonta di"irraabbanno.

⁶ Ani qarraataamu Kaaliiqiwa hige raarummo; isino macciishshie, qarri'ya baalunkunni gatisie.

⁷ Kaaliiqi sokkaasinchi Kaaliiqa waajjitannori ledo hee're agarannonsa; bushu coyi baalunkunnino gatisannonsa.

⁸ Kaaliiqi shaqqado ikkinota shiqqine la'e; iso golosi assi'rino manchi ba'raa'rinoho.

⁹ Waajjitannosiri mittoreno dihooggannona, mannisi baalu Kaaliiqa waajje!

¹⁰ Doobbiyu nafa sagale hooge hudi'rara dandaannona, Kaaliiqa hasidhannori kayinni danchare dihoogganno.

¹¹ Ooso'ya amme macciishshe"e! Kaaliiqa waajja rosiiseemmo'nena.

¹² Heeshsho baxannohunna, dancha seeda diro halchannohu,

¹³ arrawosi bunshetenni, suumesi dogatenni eemadho.

¹⁴ Bunshetewiinni xooqi; danchumma assi; keere hasi'ri; hoodesino ha'ri.

¹⁵ Kaaliiqi ille keeraano towattanno; maccasino raarensa macciishshitanno.

¹⁶ Baattote aaninni tajensa hunara yee, Kaaliiqi bunshe assitannore giwanno.

¹⁷ Keeraano raartu; Kaaliiqino macciishshinsa; qarrinsa baalunkunnino gatisinsa.

¹⁸ Kaaliiqi dadillunni hiiqqantinorira mule noonsa; hexxo hoogginore gatisannonsa.

¹⁹ Keeraanchu manchi qarri batinyeho; Kaaliiqi kayinni kunni baalunkunni gatisannosi.

²⁰ Kaaliiqi miqqasi baala agaranno; miqqasi giddonni mittu nafa dihiiqqamanno.

²¹ Bushuulle bunshensa shitannonsa; keeraano gibbannorino ba'anno.

²² Soqqamaanosi lubbo Kaaliiqi wodanno; isiwa eeggo eannohu mittu nafa diba"anno.