FAARSO 33 - Qullaawa Maxaafa

GALATU FAARSO

¹ Keeraano! Kaaliiqinni tashshi yoo'ne; wodana subbinoonniri baalu galattinasira hasiisanno.

² Kaaliiqa gingilaatunni galattesi; baganunnino faarsesi.

³ Haaro geewono geebbesi; bagana seekkitine ganne; ilillissinanni faarsesi.

⁴ Kaaliiqi qaali halaaleho; loosisi baalu suwashshoho.

⁵ Isi keeraanchimmanna halaalaancho yoo baxanno; Kaaliiqihu bagamannokki baxilli baatto wo'mino.

⁶ Kaaliiqi gordo hajajosinni, agana, arrishshonna beeddahe qaalisinni kalaqino.

⁷ Baara mittowa gamba assino; lowo baarirano ga'rannowa qixxeessino.

⁸ Baattote aana heedhinanniri baalu Kaaliiqa waajje; kalqete aana heedhinanniri baalu iso ayirrisse.

⁹ Isi coyi'reenna kalqe kalaqantino; isi hajajeenna baalunkuri xawo fulino.

¹⁰ Kaaliiqi dagate mala diiganno; hedonsano wo'mitannokki gede assanno.

¹¹ Isi mali kayinni hegerera hee'ranno. Wodanisi hedono beettu beettira sa'anno.

¹² Kaaliiqi Maganonsa ikkino manni ba'raa'rinoho; isire assi're doodhinonsa gosa ba'raadhinote.

¹³ Kaaliiqi iima gordoho hee're la"anno; mannu baalu assannoreno afanno.

¹⁴ Ayirradu barcimisira hee're, baattote aana nooha baala la"anno.

¹⁵ Wo'munku wodana kalaqinohu, loosonsa baala egennino.

¹⁶ Moote olantote batinyinni diinasi diqeelanno; wolqaataamuno wolqasi batinyinni qeelle diafi'ranno.

¹⁷ Olu faradinni qeelle afi'nanni yaa haafaho; faradu wolqa diinu anganni digatissanno.

¹⁸ Kuneeti Kaaliiqi ille waajjitannosirenna, bagamannokkiha baxillesi addaxxitannore la'anno.

¹⁹ Lubbonsa reyotenni gatisanno; hudete yannarano itisannonsa.

²⁰ Kaa'laanchinkenna wonqonke Kaaliiqaatina, ninke iso hexxineemmo.

²¹ Qullaawu su'misinni addaxxineemmona, wodaninke isinni hagiidhanno.

²² Kaaliiqa ballo, ate addaxxinoommonte gede, bagamannokkihu baxillikki ledonke hee'ro.