FAARSO 30 - Qullaawa Maxaafa

BUSHA BALANNI GATINO MANCHI GALATA

QULLAAWU MINI MAASSO GALATITA DAAWITI FAARSO

¹ Kaaliiqa, gatisoottoehuranna, baarigaarra'ya hagiidhitannoe gede, assoottoekki daafira galateemmohe.

² Kaaliiqa Magano'ya, kaa'lattoe gede, atewa hige raaroommo; atino hursittoe.

³ Kaaliiqa, lubbo'ya jeennaatu gaminni haa'rootto; waamma e"eemmokki gedeno gatisoottoe.

⁴ Ki'ne Maganu manna, Kaaliiqira faarse; Qullaawa ikkinota qaagginanni galata uuyyesi.

⁵ Hanqisi shiima yannaraati; shaqqillisi kayinni hegereraati. Hashsha wi'linanni galliro nafa, soodanno woyite hagiirre afi'nanni.

⁶ Ani keere noommo yannara, «Ikkeemmori dino» yoommo.

⁷ Kaaliiqa, shaqqillikkinni jawaatu ilaali gede ikkite goloottoe; alba go'littota kayinni masoommo.

⁸ Kaaliiqa, ate woshshi'roommo; kaa'lattoe gedeno woxaratoommo.

⁹ Ani ree waamamummoro ma kaa'leemmohe? Bushsha ikkummoro galateemmoheni? Halaalaanchimmakki kule afeemmoni?

¹⁰ Kaaliiqa, macciishshie; mararie; Kaaliiqa ballo, kaa'lie.

¹¹ Ati dadille'ya hagiirreho soorrootto; xidda'ya qasse hagiirre uddisiisoottoe.

¹² Kunnira sammi diyeemmo; wo'mu wodani'yanni faarseemmohe; Kaaliiqa Magano'ya, hegerera galateemmohe.