FAARSO 3 - Qullaawa Maxaafa

DAAWITI BEETTOSI ABESELOOMI XOOQI WARO HUUCCI'RINO HUUCCATTO

¹ Kaaliiqa, baarigaarra'ya hiitto batidhu! Ane aana ka'annori batinyeho.

² Lowo manni, «Maganu digatisannohe» yiinoe.

³ Kaaliiqa, ati kayinni anera wonqo'yaati. Qeelle uyite haxo'ya gotti assoottohu ateeti.

⁴ Kaa'lote Kaaliiqa woshshi'reemmo; isino qullaawu ilaalisi iima hee're macciishshannoe.

⁵ Ani goxeemmo; goxanono amaddannoe; Kaaliiqi kaa'lannoe daafira galagale kaeemmo.

⁶ Raga baalaho gaangeessitannoere, batinye kume diinna diwaajjeemmo.

⁷ Kaaliiqa'ya, kaie! Magano'ya, gatisie! Diinna'ya baqqaalla facattohu, cubbaataammu hinko hiiqqaqqattohu ateeti.

⁸ Gato Kaaliiqiwiinni dagganno; Kaaliiqa, mannakki maassi'ri.