FAARSO 29 - Qullaawa Maxaafa

KAALIIQI HUURO WOLQAATAAMETE

DAAWITI FAARSO

¹ Ki'ne gordu kalaqami, Kaaliiqira galata abbe; ayirrinyisinna wolqasi daafira galata shiqishshesi;

² Kaaliiqira su'misi ayirrinye abbe; Ayirrado Qullaawa dargasi Kaaliiqira kumbuulle.

³ Kaaliiqi huuro lowo baari aana macciishshantanno; ayirradu Magani banqote gede beleqanno; huurosino lowo wayi aana macciishshantanno.

⁴ Kaaliiqi huuro wolqaataamete; Kaaliiqi huuro ayirrinyu wo'minote.

⁵ Kaaliiqi huuro daguwa hiiqqaqqitanno; Kaaliiqi Libaanoosi daguwa cancananno.

⁶ Libaanoosi Ilaali siitimma burraaqanno gede, Hermooni Ilaali woraamimma xerembi'ranno gede assanno.

⁷ Kaaliiqi huuro banqote gede xadhitanno.

⁸ Kaaliiqi huuro molo baatto shaffanno; Kaaliiqi Qaadesita molo baatto tenqe assanno.

⁹ Kaaliiqi huuro qilxoota shashshaffanno; daro giggishshite dubbo fano gatisanno. Baalunku Qullaawa Minesi, «Ayirrinyu Maganoho ikko» yaanno.

¹⁰ Kaaliiqi waaho iimaanni ofollanno; Kaaliiqi hegerera moohe hee'ranno.

¹¹ Kaaliiqi mannisira wolqa aanno; Kaaliiqi mannasi maassi're keere woranno.