FAARSO 27 - Qullaawa Maxaafa

GALATU HUUCCATTO

DAAWITI FAARSO

¹ Kaaliiqi xawaabba'yaatinna gato'yaati; waajjishannoehu ayeti? Kaaliiqi heeshsho'yara goloseetina, masisannoehu ayeti?

² Bushuullu baarigaarra'ya gawajjitaeranna, maala'ya ittara ka'anno yannara sarraaqante ubbanno.

³ Lowo olanto gaangeessituero nafa wodani'ya dimasanno; olu kaierono Magano hawaqi'reemmo.

⁴ Kaaliiqa mitto coye huucci'roommo; hasi'reemmohuno hakkonneeti; hakkuno, heeshsho'ya diri baalankunni minesi hee'reemmo gede, Kaaliiqi danchumma laeemmo gedenna, Qullaawa Minesi hee're huucci'reemmo gedeeti.

⁵ Qarru yannara daasisi giddo maaxannoe; dukkanisi giddo gole amadannoe; kinchu aanano gotti asse uurrisannoe.

⁶ Kuneeti xa gaangaawi'yara noo baarigaarra aana gotti gotti assannoe. Dukkanisi giddo ilillisanni kakkaleemmo; Kaaliiqira geeweemmosi; faarseemmosi.

⁷ Kaaliiqa ballo, raare'ya macciishshie; mararie, huuccatto'yarano dawaro qolie.

⁸ Ati, «Dagge magansi'rie!» yiittoe yannara, anino, «Kaaliiqa'ya maahoyye dayemmo» yuummo.

⁹ Albakki shawwu assitootie; ati kaa'laancho'yaatina, ane soqqamaanchokki hanqite tugge agurtootie. Magano gatisaancho'ya ballo, wo'manka woyite agurtootie; callachishshootie.

¹⁰ Anni'yanna ama'ya agurtuero nafa, Kaaliiqi towatannoe.

¹¹ Kaaliiqa eeggate, doogokki rosiisie; duggannori agarte nooe daafira, keeraancho doogo ha'risie.

¹² Beebba coyidhannori, wolqatenni gawajjitaera ka'inoena, baarigaarra'yara sayisse uyitootie.

¹³ Lubbotenni hee're Kaaliiqi assanno danchumma, afummokkinni digateemmo.

¹⁴ Kaaliiqa hexxi; jawaati; wodanikkino kaajjo; Kaaliiqa hexxi.