FAARSO 25 - Qullaawa Maxaafa

BIDDISHSHANNA KAA'LO AFI'RATE KAALIIQIWA SHIQINSHOONNI HUUCCATTO

DAAWITI FAARSO

¹ Kaaliiqa ballo, wodana'ya atewa qole kayiseemmo.

² Magano'ya, ate addaxxoommona, saalaho tuggootie; baarigaarra'yano qacifattoonke"e.

³ Ate hexxitannori disaalfattanno; beebbatenni ate aana ka'annori kayinni irraabbanno.

⁴ Kaaliiqa'ya ballo, ha'rumakki leellishie; doogokki rosiisie.

⁵ Ati gatisattoe Maganooti; halaalikkinni hee'reemmo gede massagie; rosiisie; anino barra wo'ma ate hexxeemmo.

⁶ Kaaliiqa eeggate, hundinni kayise noore, maarokkinna bagamannokkiha baxillekki qaagi.

⁷ Anje'yanni hee're assoommo cubbonna sao kiirtootie; Kaaliiqa ballo, danchummakkira yite, bagamannokki baxillikkinni qaagie.

⁸ Kaaliiqi danchahonna suwashshoho; cubbaataammahono doogosi kulannonsa.

⁹ Umonsa heeshshi assitannore halaalu doogo aana ha'risannonsa; hedosino rosiisannonsa.

¹⁰ Gondoorosinna hajajosi agartannorira, Kaaliiqi loosanno loosinni maarosinna bagamannokkiha baxillesi leellishannonsa.

¹¹ Kaaliiqa eeggate, cubbi'ya bati'rinona, su'mikkira yite saie.

¹² Waajjannosi manna, Kaaliiqi doorantino doogo aana ha'risannonsa.

¹³ Dironsa baala jirotenni guddanno; oosonsano baatto ragidhanno.

¹⁴ Ayirrissannosirira baalaho Kaaliiqi jaalansaati; gondoorosino egentanno gede assannonsa.

¹⁵ Woshshaadotenni gatisannoe daafira, kaa'lo afi'rate wo'ma woyite Kaaliiqa laeemmo.

¹⁶ Callimmanna gadadu amadinoena, alba higie; mararie.

¹⁷ Wodaniya yaaddo batidhanni noona, shettote giddonni fushshie.

¹⁸ Gadado'yanna qarra'ya lai; cubbo'ya baala agurie.

¹⁹ Baarigaarra'ya batidhino gara lai; mageeshshi geeshsha gibbannoerono afi.

²⁰ Lubbo'ya agarte gatisie; ate addaxxoommona saalfachishshootie.

²¹ Ate hexxoommona, ammanamanna halaalaanchimma agartannoe gede assie.

²² Magano eeggate, Israeelete manna, qarru baalunku giddonni wodinsa.