FAARSO 23 - Qullaawa Maxaafa

KAALIIQI ALLAALAANCHO'YAATI

DAAWITI FAARSO

¹ Kaaliiqi allaalaancho'yaati; hoogeemmori mitturino dino.

² Daffino qanchira hosiisannoe; xalalu wayiwa haa're massannoe.

³ Lubbo'ya haaroonsanno; su'misi daafira yee, keeraanchimmate doogora ha'risannoe.

⁴ Reyo lawanno tunsichi giddoonni hige ha'rummoro nafa, ati ledo'ya nootto daafira diwaajjeemmo; siqqichokkinna wodambichikki sheshifachishshannoe.

⁵ Baarigaarra'ya albaanni, jila qixxeessattoe; umi'yara zayite buurittoe; anganniri boowe'yara wo'me gatanno.

⁶ Shaqqillikkinna maarokki, heeshsho'ya diri baalunkunni baxxitannoekkita afoommo. Kaaliiqi mine hegerera hee'reemmo.