FAARSO 22 - Qullaawa Maxaafa

DADILLENNA GALATU FAARSO

FAARSAANOTE ROORRICHIRA SOODIMARI GEEDIMI HIRBI GARINNI DAAWITI FAARSO

¹ Magano'ya! Magano'ya! Mayira agurittoe? Anewiinni mayira xeerti'ritto? Raare'ya macciishshite mayira gatisa giwittoe?

² Magano'ya barra wo'ma ate woshshi'reemmo; ati kayinni didawarattoe; hashsha wo'ma fooliishsho dinoe.

³ Ati kayinni Qullaawaho; Israeelete manni galatannoheho.

⁴ Annuwanke ate addaxxitino; atino gatisoottonsa.

⁵ Atewa higge raarte, balatenni gattino; ate addaxxitino; atino disaalfachishoottonsa.

⁶ Ani kayinni da'muulchoho; manna di"ikkoommo; mannu baalu mishannoe, qacifatannoe.

⁷ Afiehu baalu diqatannoe; angichunni kultanni malxifattanni,

⁸ «Kaaliiqa addaxxootto; hanni mayira gatisa hoogiheyya? Kaaliiqi baxannoheha ikkiro, mayira kaa'la hoogiheyya?» yitannoe.

⁹ Ati kayinni keerunni ilameemmo gede assoottoe; unuunu qarra hee're ate addaxxeemmoha assittoe.

¹⁰ Ilamummo barrinni kayise ate anga noommo; ama'ya godowi giddo hee'reennanni ati Magano'yaati.

¹¹ Qarru iillinoena, kaa'lannoehuno dinona, anewiinni faffooti.

¹² Lowo baarigaarra woraammate gede gaangeessitinoe; qassanno woraamma Baasaanite gede doyissitinoe;

¹³ siara ittananno doobbiyi gede, afoonsa anera manqa assite fantino.

¹⁴ Wolqa'ya waa ikkitu; miqqa'ya baala addi addinni fultu; wodani'ya gagate gede daaqi.

¹⁵ Kokke qa'a yite mooltue; arrawi'ya ga'roho qa'mie. Shinoonnihu gede uulla tugge agurittoe.

¹⁶ Bushu manni woshshu gede gaangeessie; woshshu gede tuudde amaddue; anga'yanna lekka'ya ladditue.

¹⁷ Miqqa'ya baala reqecci yitanno; baarigaarra'yano ikkito'ya la'e hagiidhitanno.

¹⁸ Uddanna'yano adhitu; hixa tuqqite beeqqitu.

¹⁹ Ati kayinni Kaaliiqa ballo, anewiinni faffooti; ati wolqa'yaatina, rakke dagge kaa'lie.

²⁰ Bisetenni gatisie; lubbo'ya woshshu kunniwiinni agarie.

²¹ Doobbiyu afiinni gatisie; lubbo'ya qassanno buudda woraammannitenni agarie.

²² Su'mikki jawimma roduuwi'yara kuleemmo; songote mereerono galateemmohe.

²³ Ki'ne Kaaliiqa waajjitinanniri galattesi; Yaiqoobi sirchi baalunku ayirrissesi; Israeelete manni baalunku waajjesi.

²⁴ Qarraataamo dimishanno; lashshino diassanno; albasino isiwiinni shawwu diassanno; isiwa raaranno woyite macciishshannosi.

²⁵ Assoottoerira lowo songo mereero galateemmohe; waajjitannoheri albaanni xano'ya uyi'reemmo.

²⁶ Buxane duubba geeshsha ittanno; Kaaliiqa hasidhannori galattannosi; insa, heeshshonsa diri baalunkunni qawaaxxidhe heedho!

^27-29 Gashshootu Kaaliiqihona, gosa baala qaagge, Kaaliiqiwa higganno; daga baala albasiinni kumbuultanno. Kunni daafira, daga isi gashshanno. Baattote aani duuwaleeyye baala jilte isira kumbuultanno; bushsha e'annori baalunna, lubbonsa reyotenni gatisidhe affannokkiri baalu, albasiinni guluphitanno.

³⁰ Dagganno ilama soqqantannosi; mannuno Mootichu looso dagganno ilamara kulanno.

³¹ Kunni ka'a ilamanno mannira, «Kaaliiqi mannasi gatisino» yine kullanni.