FAARSO 20 - Qullaawa Maxaafa

QEELLE AFI'RATE HUUCCINOONNI HUUCCATTO

FAARSAANOTE ROORRICHITA DAAWITI FAARSO

¹ Qarrikki barra Kaaliiqi macciishshohe; Yaiqoobi Magani agarohe.

² Qullaawu Minisinni kaa'lo soohe; Tsiyooni hee're irkisohe.

³ Fushshaatekki adhohe; shilqote kakkalokkinni hagiidhohe.

⁴ Wodanikki halcho gede oohe; hedokki baalanta wonshohe.

⁵ Diinu anganni gatisoottonke daafira hagiirrunni qeexaa'lineemmo; Maganinke su'minni gotti gotti yineemmo; huuccattokki baala Kaaliiqi wonshohe.

⁶ Kaaliiqi buurino moote gatisannosita xa afummo; gordoho qullaawu dargisira hee're dawarannosi; wolqasinni bayira qeelle aannosi.

⁷ Mitu mitu olu faradi gaarensa, wolootu faradonsa addaxxitanno; ninke kayinni Maganinke Kaaliiqi wolqa addaxxineemmo.

⁸ Insa sarraaqante ubbanno; ninke kayinni ka'ne, jawaante uurrineemmo.

⁹ Kaaliiqa ballo, buuramino mootera qeelle uyisi; woshshi'neemmohe barrano macciishshinke.