FAARSO 16 - Qullaawa Maxaafa

MAGANO ADDAXXATE HUUCCATTO

DAAWITITA MURGOTE FAARSO

¹ Magano'ya ballo, ati golo'yaatina agarie.

² Anino Kaaliiqa, «Ati Mooticha'yaati; ate ka'a danchu coyi dinoe» yuummo.

³ Baattote aana noo keeraano baala, ledonsa heera'yanni hagiidheemmo ayirraddaati.

⁴ Wole maganna hoode doddannorira qarru bati'rannonsa; ani kayinni kakkalonsara dikarsameemmo; magannansano dimagansi'reemmo.

⁵ Kaaliiqa, ati iqqa'yaatinna kaayyo'yaati; geedo'ya seekkattohuno ateeti.

⁶ Siiwo ganni woyite, danchu dargi iillinoe; iqqi'yano biifinoe.

⁷ Amaalinoeha Kaaliiqa galaxxeemmo; wodani'ya hashsha nafa seejjannoe.

⁸ Wo'manka woyite Kaaliiqa alba'yaanni nooha afeemmo; qiniite'yaanni noo daafira dimaseemmo.

⁹ Lubbo'ya jeennaateho diagurattose; qullaawakki hoqara worte diagurattosi;

¹⁰ kunnira, wodani'ya hagiidhanno; arrawi'yano hisatanno. Manninati'yano yaaddo nookkiha galanno.

¹¹ Heeshshote doogo leellishoottoena, ledokki hee'ra'ya hagiirrunni wonshitannoe; qiniitekkiinni hee'ra hegere hagiirre uyitannoe.