FAARSO 147 - Qullaawa Maxaafa

WO'MANKA DANDAANNO MAGANIRA SHIQISHI'NANNI GALATA

¹ Kaaliiqa galatte! Maganinkera galatu faarso shiqisha danchate; iso galata tashshi assitannotenna hasiissannote.

² Kaaliiqi Yerusaalame haaroonsanno; Israeeletenni shorrantinoreno qolannonsa.

³ Wodana hiiqqantinore dhaawannonsa; madansarano gaga gananno.

⁴ Isi beeddahete kiiro egennino; mitte mittenta su'misenni woshshanno.

⁵ Maganinke jawahonna wolqaataamoho; ogimmasino bikkine didandiinannite.

⁶ Umonsa heeshshi assitinore gotti gotti assannonsa; haxawarroota kayinni shollishe bushsha eessannonsa.

⁷ Kaaliiqira galatu faarso faarse! Bagana gantinanni Maganinkera faarse!

⁸ Isi gomicho gordu aana diriirsanno; baattote xeena aanno; ilaallate aanano hayisso fushshanno.

⁹ Saadate ittannore aannonsa; itannore hooge raarannoha, haraqeeyyete caacurre itisanno.

¹⁰ Kaaliiqi jawaatu faradinninna, bagadaasinetenni dihagiidhanno.

¹¹ Isi ayirrissannosirinninna, bagamannokki baxillesi addaxxitannorinni hagiidhanno.

¹² Yerusaalame, Kaaliiqa galati! Tsiyooni, Maganokki galati!

¹³ Isi waalchuwakki kaajjishe agaranno; giddokki nooha mannakkino maassi'ranno.

¹⁴ Isi dannakki seekke agaranno; dancha qamadeno duushshannohe.

¹⁵ Baattote hajajo aanno; qaalisino hakkawoyintenni wo'manno.

¹⁶ Bullaame kaade seemmate gede asse haganno; qorra bukote gede asse fincanno.

¹⁷ Kaade shiimmaadda kinna gede asse dirrisanno; isi dirrisanno qorra ayino didandaanno.

¹⁸ Hakkunni gedensaanni hajajo aanno; kaadeno shiiltanno; bubbe bubbissanno; wayino lolahanno.

¹⁹ Qaalesi mannaho, wogasinna hajajosi Israeelete aanno.

²⁰ Seerasi afinokki daafira, konne baala wolu mannira diassino. Kaaliiqi galatamo!