FAARSO 139 - Qullaawa Maxaafa

KAALIIQITA GUUTA EGENNONNA TOWANYOSI

FAARSAANOTE ROORRICHIRA DAAWITI FAARSO

¹ Kaaliiqa'ya, fonqolte laoottoe.

² Ati asseemmore baala egennootto; hedo'ya baala xeertote heedhe afatto.

³ Ha'reemmowanna fooliishshi'reemmowa la"atto; looso'ya baala egennootto.

⁴ Hedoommore coyi'rummokkinni balaxxe afatto.

⁵ Gaangaawi'yara nootto; wolqakkinnino agarattoe.

⁶ Ate egenno lowo geeshsha bati'rate; ane hedora aleenniiti.

⁷ Atewiinni xooqe hiikka ha'reemmo? Albikkinni ho'le hiikka mareemmo?

⁸ Gordu iimira fulummoro hakkiicho ati nootto; jeennaate dirrummorono hakkiicho ati nootto.

⁹ Buuwe arrishsho fultannowa marummoro, woy arrishsho e'annowa mare hee'rummorono,

¹⁰ ati hakkiicho hee'ratto; qiniiticho angakkinni seekkite amadattoe.

¹¹ Tunsicho, «Golie», woy xawaabba «Hashsha ikkie» yuummoro,

¹² atera tunsichu nafa ditunsanno; hashshuno barri gede xawannohe; atera tunsichunna xawaabbu taaloho.

¹³ Mannimma'ya baala kalaqoottoehu ateeti; ama'ya godowi giddo xaadisse seekkoottoehu ateeti.

¹⁴ Dhaggennihanna maalalenniha assite kalaqoottoena, galaxxeemmohe; loosikki baalu dhaggenniho; anino seekke egennoommo.

¹⁵ Miqqa'ya seekkantanni heedheenna, ama'ya godowi giddo sunuutunni xaaddanni heedheenna, hakkiicho go'le lophanni hee'reenna, ati afoottoe.

¹⁶ Ilamammora albaanni afoottoe; hendoonnie barri iillara albaanni tajete borrokkira amadame keeshshino.

¹⁷ Magano'ya ballo, hedokki lowo geeshsha bati'ra ikkitinohura, ani buuxammora didandoommo.

¹⁸ Kiirroommero hedokki baaru shaafi gede bati'rate; baqqi yeemmo woyiteno atee ledo noommo.

¹⁹ Magano'ya ballo, bushuulle hunattora hiitto halchoommo! Haxawarrootu muli'yanni faffoommero hiitto baxeemmo!

²⁰ Insa ate aana busha coye coyidhanno; baarigaarretenni su'makki huntanno.

²¹ Kaaliiqa, gibbannohere lowo geeshsha giweemmo; atera gara gibbannoreno lowo geeshsha makki'roommo.

²² Co'o giweemmonsa; baarigaarra'ya gede asse laeemmonsa.

²³ Magano'ya ballo, fonqolte fonii'yatano afi; jiffe laie; hedo'yano afi.

²⁴ Giddo'ya sao nooro lai; hegere doogo aanano ha'risie.