FAARSO 138 - Qullaawa Maxaafa

GALATU HUUCCATTO

DAAWITI FAARSO

¹ Kaaliiqa'ya, wo'mu wodani'yanni galaxxeemmohe; sokkaasinete albaanni atera galatu faarso faarseemmohe.

² Bagamannokkihu baxillikkinna halaalaanchimmakki daafira, su'mikkitanna qaalikki lowimma leellishootto daafira, Qullaawu Minikki widira hige kumbuulanni galaxxeemmohe.

³ Woshshi'rummohe yannara yee yoottoe; jawaantekkinni jawaachishoottoe.

⁴ Kaaliiqa, qaalekki macciishshitino daafira, kalqete mootoolla baala galattannohe.

⁵ Assootto dhaggeranna jawu ayirrinyikki daafira faarsitohe.

⁶ Wo'munkura Aliidiha ikkite heedhenni jooguulle towatatto; bonaleeyyeno albikkinni go'litara didandiitanno.

⁷ Qarru gaangeessannoe woyite, lubbotenni worattoe; aarunni ka'inoe diinna gante, wolqakkinni gatisattoe.

⁸ Hedootto hedo wonshattoe; Kaaliiqa'ya, bagamannokkihu baxillikki hegereho; hanafootto looso gudittokkinni diaguratto.