FAARSO 120 - Qullaawa Maxaafa

KAPHAASINETENNA DOGAASINETEWIINNI GATATE HUUCCI'NANNI HUUCCATTO

IIMALLITTETE FAARSO

¹ Qarru iillie yannara, Kaaliiqiwa hige raaroommo; isino macciishshinoe.

² Kaaliiqa'ya ballo, kaphaasinetenna dogaasinetewiinni gatisie.

³ Ki'ne dogaasine! Maganu ki'ne hiissi'nero woyyate? Hiitto asse qorichishi'nero woyyate?

⁴ Quxaminohu gaaddote maxxinninso, giirate kashilinni giiri'nero woyyate?

⁵ Ki'ne ledo hee'ra, Kaajjado Mesheeki woy Qeedaari gosa ledo hee'rate gedee bushaati.

⁶ Keere baxxannokki gosa ledo, lowo geeshsha seeda yanna hee'roommo.

⁷ Ani keeru daafira hasaaweemmo woyite, insa olunnire hasaabbanno.