FAARSO 116 - Qullaawa Maxaafa

REYOTENNI GATINO MANCHI MAGANOHO SHIQISHINO GALATA

¹ Raare'yanna huuccatto'ya macciishshinoe daafira, Kaaliiqa baxeemmosi.

² Maccasi anewa qolanno daafira, heeshsho'ya diri baalunkunni woshshi'reemmosi.

³ Reyote dano doyisitue; waammate waajjilli gaangeessie; waajjillunna yaaddo amaddue.

⁴ Hattenne yannara, «Kaaliiqa'ya ballo, gatisie!» yaanni, isiwa hige raarummo.

⁵ Kaaliiqi mararannohonna shaqqadoho; Maganinke shooshaqaho.

⁶ Kaaliiqi wolqa afidhinokkire kaa'lannonsa; aneno qarramummo yannara gatisinoe.

⁷ Kaaliiqi danchare assinohe daafira, lubbo'ya, xaanni fooliishshi'ri!

⁸ Kaaliiqi reyotenni gatisinoe; ille'ya hindiiddono uurrisinoe; uweemmokki gedeno agarinoe.

⁹ Kunnira heeshshonniri heedhannowa, Kaaliiqi albaanni hee'reemmo.

¹⁰ «Lowo geeshsha shetoommo!» yuummo yannara nafa, ammana'ya diaguroommo.

¹¹ Waajjillu batirieta, «Ayeno diammaneemmo» yoommo.

¹² Assinoehura danchu coyi baalaho, Kaaliiqira hanni ma"asse qoleemmosi?

¹³ Maganu gatisinoe daafira, woyinete xajje fushshaate shiqishi're galaxxeemmosi.

¹⁴ Mannisi baalu albaanni mare, Kaaliiqira xa'noommo xano uyi'reemmo.

¹⁵ Keeraanote reyo, Kaaliiqi albaanni ayirradote.

¹⁶ Kaaliiqa! Ani ate soqqamaanchooti; ama'ya soqqantuhente gede anino soqqameemmohe; ati reyotenni gatisoottoe.

¹⁷ Galatu kakkalo shiqisheemmohe; ateno magansi'reemmohe.

¹⁸ Mannikki baalu albaanni mare, atera xa'noommo xano uyi'reemmo.

¹⁹ Shiqishi'reemmohuno, Yerusaalamete noohura Qullaawu Minikki nafariraati. Kaaliiqira galatu iillosi!