FAARSO 114 - Qullaawa Maxaafa

ISRAEELE GIBITSETENNI FULTU AYYAANA QAAGIISSITANNO FAARSO

¹ Israeele Gibitsetenni fultu waro, Yaiqoobi sirchino hattenne allaggu gobba agure fuli yannara,

² Yihudu Kaaliiqira Qullaawa manna ikki; Israeeleno isi utuwa ikkitu.

³ Duumu Baari tenne afe xooqi; Yordaanoosi Wayino lolaha agure badhera higi.

⁴ Ilaalla, waajjino goodanni gede dammaqqu; gaarrano ge'reewu wilii'li gede baraggu.

⁵ Koo Baara, maikkite xooqitto? Koo Yordaanoosi, lolaha mayira aguritto?

⁶ Ki'ne ilaalla waajjino goodanni gede mayira dammaqqini? Ki'ne gaarrano ge'reewu wilii'li gede mayira baraggini?

⁷ Ati baatto! Kaaliiqi albaanni, Yaiqoobi Magani albaanni waajjillunni qece yii.

⁸ Isi jaama kincho kofamete wayira, care xashshoho soorranno.