FAARSO 108 - Qullaawa Maxaafa

MAGANU KAA'LO AFI'RATE SHIQINSHOONNI HUUCCATTO

DAAWITI FAARSO

¹ Wodani'ya dishafamannoho; Magano! Wodani'ya dishafamannoho. Kunnira geeweemmohe; faarseemmohe.

² Lubbo'ya baqqi yii! Gingilaatunna baganu ka'e! Anino gute kaeemmo.

³ Mooticha! Gosate giddo galateemmohe; dagate mereerono faarseemmohe;

⁴ bagamannokkihu baxillikki gordoho qasi'rino; halaalaanchimmakkino gomichu geeshsha iillitino.

⁵ Magano! Iima gordoho ayirri; ayirrinyikkino gobba baalate leello.

⁶ Baxattohu mannikki gatanno gede, huuccattonke macciishshi; wolqakkinni gatisinke.

⁷ Maganu Qullaawu Dargisira hee're, «Tashshi yaannae Sekeemi beeheemmo; Sukooti lagicha manni'yara qeecheemmo.

⁸ Geleaadi aneho; Minaaseno aneho; Efireemi siwiilu gullee'yaati; Yihuduno gashshooti'ya siqqooti.

⁹ Moaabi hayishshi'reemmo badirooti; Edoomi umi'yaha ikkinota egensiisate, caamma'ya wodheemmowaati. Filisxeemoota qeeloommo daafira qeexaa'leemmo» yiino.

¹⁰ Qiinshoonni katama ayi massae ikka? Edoomiyaasira ayi haa're ha'rae ikka?

¹¹ Magano! Ati tugge aguroottonke; olantonke ledono olunniwa fula giwootto.

¹² Mannu kaa'lo ditirtannotena, diinanke qeelleemmo kaayyo uyinke.

¹³ Maganu ledonke hee'riro qeelleemmo! Isi diinnanke lekkasira woroonni kadanno.