FAARSO 102 - Qullaawa Maxaafa

QARRAMINO MANCHI HUUCCATTO

YAADANNI KAALIIQA HUUCCI'RI YANNARA QARRAATAAMU HUUCCATTO

¹ Kaaliiqa ballo, huuccatto'ya macciishshie! Kaa'lote raareemmo raare hidhie.

² Qarru iillannoe yannara muli'yanni faffootie; maccakki ane widira qolte, woshshi'reemmohe woyite rakke dawarie.

³ Diri'ya wiliilete gede ikke goofanni no; manninati'yano giirate gede buwanni no.

⁴ Kakkandoonni hayisso gede ikke mooloommo; kokkeno iteemmore gibbue.

⁵ Qoonqo'ya naggi asse ureemmo; maalu goofeenna miqichu callu gatinoe.

⁶ Callichose dubboho heedhanno huummo gedenna, onaho heedhanno awulcho gede ikkoommo.

⁷ Illete goxichu horonta didaannoe; minu iima callichose ofoltino ceicho gede ikkoommo.

⁸ Baarigaarra'ya wo'manka woyite xontannoe; qacifattannoeri ane su'ma kayisse wole runtanno.

^9-10 Hanqikkinninna aarikkinni kainohunni, haadhe tugge aguroottoe; buluulu sagale ikkinoe; hindiiddo ageemmori ledo karsantinoe.

¹¹ Diri'ya hawarro caali gedeeha ikkino; anino mooltino hayisso gede ikkoommo.

¹² Kaaliiqa, ati kayinni hegerera mootete; ilama baala qaaggannohe.

¹³ Tsiyooni mararatto yanna daggino daafira, ati ka'e katama jawaachishatto; kuneeti yannano xaati.

¹⁴ Diigamiro nafa konne katama soqqamaanokki baxxannosi; giggiliha ikkiro nafa, marartannosi.

¹⁵ Daga Kaaliiqa waajjitanno; baattote aani mootoolla baala wolqasi la'e massanno.

¹⁶ Kaaliiqi Tsiyooni gatamaranno; isino ayirrinyisinni leellanno.

¹⁷ Hawaminohunnita mannisi ku'lo macciishshanno; huuccattonsano lashshi diassanno.

¹⁸ Ilamara noo manni baalu galatannosi gede, Kaaliiqi assinore borreessitine worre.

^19-20 Usuranyootu raare macciishshe, reyote hendoonnire gatisate, Kaaliiqi iima noohura qullaawu dargisira hee're lai; gordoho hee're eela qole la"anno.

²¹ Gosanna gashshootu mitteenni gamba yite, Kaaliiqa magansidhanno yannara,

²² Kaaliiqi su'mi Tsiyooni duduwamanno; Yerusaalameteno galatamanno.

²³ Kaaliiqi anje hee'reennanni akkalsinoe; diro'yano haransino.

²⁴ Magano'ya ballo, geedhummokkinni haadhe hooltootie. Kaaliiqa ati hegerera hee'rattoho.

²⁵ Umo assite baatto kalaqootto; gordono angakkinni seekkootto.

²⁶ Insa sa'anno; ati kayinni hee'ratto; uddanote gede akkaltanno; aaniidi uddano gede soorrattonsa; insano ba'anno.

²⁷ Ati kayinni, hegere geeshsha ateentilla; dirikkirano gawalo dino.

²⁸ Soqqamaanokki ooso keerunni heedhanno; sirchinsano ate hawaqi're hee'ranno.