FAARSO 10 - Qullaawa Maxaafa

HALAALAANCHO YOO AFI'RATE SHIQINSHANNI HUUCCATTO

¹ Kaaliiqa ballo, mayira xeertidhe uurritto? Qarru yannara huurokki mayira maaxitto?

² Bushu manchi boo'nasinni buxicho qarrisanno; assino xagarro umosi qolte amaddanno.

³ Wodanisi halchonni adawadhanno; honqooqicha maassi'ranno; Maganono seyatanno.

⁴ Bushu manchi boo'nasinni kainohunni Magano dihasi'ranno; Maganu assannori nookkiha lawannosi.

⁵ Assi'riri baalu qinaannosi; Maganu seerino wodanisinni fafino; baarigaarrasino malxifatanno.

⁶ Wodanisinni, «Ilamate ilama geeshsha ayino milli dissannoe; mitiimmano diamaddannoe» yaanno.

⁷ Afiisira rumo, doganna, boollaqi'ra wo'mitino. Arrawisira xagarronna sao no.

⁸ Maaxame keeraano shaara, qachu giddo gaa'le agaranno. Illesino hawaaxantinore qottanno.

⁹ Doobbiichu gede citu giddo maaxame agaranno. Buxicho amadara rie agaranno; woshshaadosinni amade goshooshe haa're ha'ranno.

¹⁰ Buxichu cancaname haxo heeshshi yee, wolqaataammu anga uwanno.

¹¹ Bushu manchi wodanisinni, «Maganu assannoeri dino; la"annoekki gede alba shawwu yiino» yaanno.

¹² Kaaliiqa ballo, gotti yite bushuullu aana angakki kayisi! Qarraataamma habbootinsa.

¹³ Bushu manchi Magano mayira mishanno? Wodanisinnino, «Maganu assannoeri dino» mayira yaanno?

¹⁴ Ati Maganu kayinni qarranna shetto la"atto; wo'manka woyite towatate qixxaawaho; hawaaxamu irkisattosira atewa shiqanno; annanna ama hoogginoreno ati kaa'latto.

¹⁵ Cubbaataammunnitanna bushuullu cigile hiiqqi; loosinsata uyinsa; higge higgannokki gede assinsa.

¹⁶ Kaaliiqi hegerera moohe hee'ranno; wole maganna magansidhannori baattosi aaninni ba'anno.

¹⁷ Kaaliiqa, gadadaammu huuccatto macciishshite, jawaachishattonsa; maccakkino insa widira qolte,

¹⁸ baattote aana hee'rannohu ayino wole waajjishiishannokki gede, annanna ama afidhinokkiriranna qarraataammaho golamattonsa.