ERMIYAASI 7 - Qullaawa Maxaafa

ERMIYAASI MAGANU SOKKA MANNAHO QULLAAWU MINI GIDDO KULI

¹ Kaaliiqi,

² «Marte Qullaawu Mini waalchira uurrite, ane magansi'rara eanno mannira, ‹Ki'ne Yihudu manni Kaaliiqi qaale macciishshe!

³ Olantote Mootichi Kaaliiqi Israeelete Magani, tenne baattora hee'ra hasidhiniro, busha ha'rinsho'nenna looso'ne soorridhe.

⁴ Qullaawu Mini'ya konniicho noo daafira calla, Maganu gatisannonke yitinanni dogantinoonte.

⁵ « ‹Ha'rinsho'nenna looso'ne soorridhe; mimmiti'nera taalo coye assitinanni heedhe.

⁶ Manni gobba manna, annanna ama afi'rinokkirenna gunnoota xiibbinoonte. Tenne gobbara hee'rannoha beebbaataamo manna shitinoonte. Ba'inannina kaphu maganna magansidhinoonte.

⁷ Kunni garinni umo'ne woyyeessitinanniha ikkiro, akaakka'nera hegere iqqa asse oommo baattora heedhinanni gede asseemmo'ne.

⁸ « ‹Kune ki'ne ikkannokkiha kaphu qaale ammantinoonni.

⁹ Ki'ne moortinanni, beebbaataamo manna shitinanni. Foortinanni; beebbatenni xaartinanni; Ba"aalira kakkaltinanni; albaanni egentinoonnikkita kaphu maganna magansidhinanni.

¹⁰ Konne ani giweemmore baala assitinihu gedensaanni Qullaawu Mini'yawa daggine alba'yaanni uurritine, «Ninke gantoommo» yitinanni.

¹¹ Kuni Qullaawu Mini'ya mooraanote goda lawi'ne? Ani Kaaliiqi konne assitinannire baala afoommo.

¹² Ani magansi'naera balaxe dooroommo dargira Seelora martine, manni'ya Israeele assitino bunshera hakkiicho assoommore la'e.

¹³ Konne baala assitine heedhineennanni, marro marro hige kuloommo'ne. Ki'ne kayinni macciishsha gibbinoonni; woshshummo'ne yannarano, «Yee» diyitinoonni.

¹⁴ Kunnira, Seelo assummo coye konne addaxxitinannihura Qullaawu Mini aanano asseemmo. Konne akaakka'neranna ki'nera oommo dargano Seelo assummo gedee coye asseemmo.

¹⁵ Ki'ne Yihudu manna! Ilama'ne Israeelete manna gobba'yanni fushshe hunummonte gede, ki'neno gobba'yanni fushshe huneemmo. Konne coye coyi'roommohu ani Kaaliiqaati› » yii.

MANNU HAJAJAMA GIWI

¹⁶ Kaaliiqi, «Ermiyaasi! Ani dimacciishsheemmona, kunni manni daafira huuccitootie. Insara huuccitanni beebba raartooti; mulla haafa eegantooti.

¹⁷ Insa Yihudu katammaranna Yerusaalamete dooggara assitannore dila"atto?

¹⁸ Ooso haqqe gamba assitanno; annuwa giira giirtanno. Meentu Gordu Mootitteeti yinannitera kaphu maganora tima ganara bullee liisanno. Ane hanqissara yite agattote fushshaate wole kaphu magannara lolaassino.

¹⁹ Konne saalsiisanno coye assansanni umonsa ikkinnina ane diheleeltanno; uminsara shollinye abbidhanno.

²⁰ Kunnira ani Mootichu Kaaliiqi, xa hanqo'yanna aara'ya konniicho mannunna saadate aana, dubbu haqqenna laalchu baalu aana duneemmo. Hanqi'ya xoyissine anfannikkiha ikkanno.

²¹ «Ani Israeelete Magani Olantote Mootichi Kaaliiqi kuleemmo'neri konneeti: Shilqote kakkalo wole kakkalo ledo xaadissine, maalano sammi yitinella itte.

²² Akaakka'ne Gibitsete gobbanni fushshummo waro, shilqote kakkalono woleno shiqishshannoe gede dihajajoommonsa.

²³ Kayinnilla, ani Magano'ne ikkeemmo gedenna ki'neno manna'ya ikkitinanni gede ani yoommore macciishshe. Hajajoommo'ne gede ikkitiniro baalunku coyi qinaanno'ne yoommonsa.

²⁴ Annuwa'ne kayinni macciishsha gibbinoe. Bushunna haxawarru wodaninsa hedannore assitino. Ani alba higge hadhanno gede hedummoro, insa kayinni badhe higge hadhanno.

²⁵ Akaakka'ne Gibitsetenni fultu barrinni kayise techo geeshsha, soqqamaano'ya himanaano ki'newa soommokki yanna dino.

²⁶ Ikkollana macciishshinohunna wodana assinohu dino. Saimanka harrichu gede haxo mokkookkitine hettisantinannire ikkitinoonni.

²⁷ «Ermiyaasi! Ati konne baala qaale'ya manni'yara kulatto; insa kayinni dimacciishshitannohe. Ati woshshattonsa; insa kayinni, ‹Yee› diyitanno.

²⁸ Ati mannaho, ‹Ki'ne Yihudu manna! Ani Kaaliiqi Magano'neeti. Ki'ne kayinni ani yoommota macciishsha gibbinoonni. Qorichishummo'ne yannara busha doogo'nenni dihigginoonni. Ammanamano gibbinoonnie. Tenne daafira kayise coyi'rannohu nafa dino› yiinsa» yiie.

HINOONI LAGICHIRA ASSITINOTA MAKKI'NANNI BUNSHE

²⁹ Kaaliiqi, «Ani Kaaliiqi hanqoommo; manna'yano giwoommo; umo'ne meexxitine dadille; gaarra baalate aana fultine kiirtine wi'le.

³⁰ Ki'ne Yihudu manni busha coye assitinoonni; ani giweemmota kaphu maganna abbitine wortine Qullaawa Mine'ya batteessitinoonni.

³¹ Hinoomi Lagichira Tofeeti yinanniha kakkalote darga seekkitine ooso'ne shilqote kakkalo assitine shiqishshinoonni. Kunino ani hajajoommohanna wodani'ya hedino coye di"ikkino.

³² Kunnira, konne darga Hinoomi woy Tofeeti Lagicha yaa agurre Gorrote Lagichaati yinanni yanna dagganno. Wolu waammate dargi hee'rannokki daafira, hakkiichi manna waammanniwa ikkanno.

³³ Reeshshi'ne allaattetenna moyichoho sagale ikkanno; itanno'neha shorre hoolannohu dihee'ranno.

³⁴ Baatto mulla ikkitanno Yerusaalamete dooggaranna Yihudu Katamma baalate hagiirrenna qeexaala, adhatenna adhamate ililleette dimacciishshinanni» yii.