ERMIYAASI 6 - Qullaawa Maxaafa

DIINU YERUSAALAME DOYISSI

¹ Kaaliiqi, «Ki'ne Biiniyaami manna! Qarrunna bao aliyye raginni dagganni noona, gattinanni gede Yerusaalametenni fultine xooqqe. Teqoa katamira xurumba ufuuffe; Beetihakaremi katamirano malaateho giira giirre.

² Ate xu'moottohanna biifoottoha, Tsiyooni katama huneemmo.

³ Allaalaasine hoshshansa adhite daggannohu gede, mootoolla olantonsa adhite dagge, Yerusaalamete katama amaddanno. Olantonsa wodhitanno dukkanna base baalate qasidhe, kalote giddo farsha yee noo ge'reewi gede ikkitanno» yii.

⁴ Mootoollano, «Yerusaalame qasate qixxaabbe! Barru taalo bala tungeemmona ka'e! Keeshshanke gara di"ikkitino; yanna hawarritanni no; arrishshono e'araati.

⁵ Ka'e, hashsha fulle kataminsara bala tunge, qiishonsa diingona» yitu.

⁶ Olantote Mootichi Kaaliiqi mootoollate, «Haqqe dolle; Yerusaalamete gaangaawira, bushsha duuntine qiisho seekke; giddosi bunshe wo'mitino daafira qoricha adha hasiissannosi.

⁷ Balete giddonni wayi fulannohu gede, Yerusaalamete kataminni bunshe fultanno; isi giddonni fultannota, beebbatenna barshu raare macciishshoommo; wo'manka woyite dhibbanna mada calla anfanni.

⁸ Ki'ne Yerusaalamete manna, kuni qarri ki'nera qorophishiishsha ikko'ne; gibbiniro kayinni badhe wodheemmo'ne; katama'ne onche ayino hee'rannokkiha asseemmo» yii.

ISRAEELETE MANNI HAXAWARRIMMA

⁹ Olantote Mootichi Kaaliiqi, «Gattinota woyinete laalo co'o assine xinqinannihu gede, diinu Israeelete gobbara noore baala co'o asse gudanno; woyinete xaro xinqi'ranno manchi gede, anga'ne sinnate aanira diriirse» yiie.

¹⁰ Anino qole, «Mannaho qorichishattonsata kuloommo; insa kayinni macciishsha gibbe oso'litino.

¹¹ Mooticha'ya, ate hanqi ane giddono buwanni no; giddo'ya amade keeshshiisha didandoommo» yoommo. Kaaliiqino, «Hanqo'ya doogote aana noo qaaqquulli aananna, gamba yite noo wedelli aana duni; ayiddaannanna ayiddaama mitteenni haa'nanni; lowo geeshsha geedhino geerri nafa digatanno.

¹² Ani Yihudu manna qorichisheemmo yannara, mininsa, gatinsanna galtensa nafa gattukkinni, wolu mannira sayise eemmo. Konne coye coyi'roommohu ani Kaaliiqaati.

¹³ Mannu baalu hanaaqunni woxe duu'nanno; himanaanonna qeesootu nafa manna dogganno.

¹⁴ Manni'ya mada mullare assite kiirtanno; xagichono digantanno. Keeru nookkiha, ‹Keereholla! Keereholla!› yitanno.

¹⁵ Konne battete coye baala assansanni saaltinoni? Horo hanukkino diyitino; saalu maatirono diegentino. Kunnira wolootu ubbu gede insano ubbanno; qorichisheemmonsa yannara, hakkiichi gawalonsa ikkanno. Konne coye coyi'roommohu ani Kaaliiqaati» yii.

ISRAEELETE MANNI MAGANU DOOGO GIWI

¹⁶ Kaaliiqi Israeelete mannira, «Lame doogo xaaddannowa uurritine la'e! Albitinna woyyitanno doogo hiittenneetiro xa'mitine affe! Affinihu gedensaanni, hattenne doogo higgine hadhe! Lubbo'nera fooliishsho afidhinannina» yiinsa. Mannu kayinni, «Tenne doogo hinge diha'neemmo» yii. Kaaliiqi,

¹⁷ «Ani qarru daanni noota kulte qorophisiissara, himanaano soommo; himanaano xurumba ufuuffuta, insa kayinni, ‹Dimacciishshineemmo› yitino» yii.

¹⁸ Kunni daafira Kaaliiqi, «Ki'ne baattote aana heedhinoonni gosa baala, manni'ya aana asseemmore baala seekkitine buuxxe.

¹⁹ Baatto macciishshi! Manni'ya ane mishinoe; hajajo'yano agadha giwino. Busha coye assate ma'lino; xa hatti heddino bunshe insara dagganno.

²⁰ Ki'ne Yihudu manna! Saaba gobbanni hixaana, fafo gobbannino su'niitanno qimame abbitinoonnie; addi addi kakkalono kakkaltinoonnie; kuni anera ma assannoe? Konne abbitinoonnie afansha baala giwoommo.

²¹ Kunnira konne manna sarraaqe karannore woreemmo; annuwanna ooso, olliichunna darawo, mannu baalunku gatikkinni mitteenni reyanno» yii.

ALIYYE ISRAEELE AMADANNO DIINA

²² Kaaliiqi, «Aliyyera qoltine la'e! Kune fafo gobbara heedhannoti wolqaataame gosa, olaho qixxaabbanni no.

²³ Insano digaananna urde amaxxite nooreeti; kaajjaddahonna marartannokkireeti; faradinsa hirbi dambalu gedeeho. Yerusaalame! Kune insa ate qassara dagganni no» yii.

²⁴ Yerusaalamete manni insa insanaawa: «Konne duduwo macciishshinummota wolqanke daaqqu; game amaddino mancho gede, masillunna yaaddo amaddinonke.

²⁵ Xawo higgine fultinoonte; doogoteno kawanna ka'a ha'rantinoonte; base baalate olu noona umo'ne agadhe» yitu.

²⁶ Kaaliiqi mannisira, «Guda'nera dayino diini, hedeweelcho bala tuga'neraatina, xiddu uddano uddidhine buluulu aana ofolle! Afi'rinoha mitto beetto shii'rino manchi gede, hururantine wi'le.

²⁷ Ermiyaasi! Siwiila giirate worre fonqollannihu gede, manni'ya hiittoohoro hanni fonqolte lai.

²⁸ Insa baalunku siwiilunna camote gedee kaajjaddaati; hettisama giddo wo'mitino haxawarrootaati; wo'manka woyite kapho calla gobba tuqissanno.

²⁹ Siwiila tumannohu siwiilu aaninni xilla kayisate, giirate wore buufunni buufanno; manni'ya aaninni bunshe dika'annona, beebballa buunfanni daafurranni.

³⁰ Manni'ya kunni garinni bushino; bunshe insawiinni horonta bande hoola didandiinanni. Ani Kaaliiqi giwoommonsa daafira, mannu, ‹Hunnoonni birraati› yaannonsa» yii.